واشنگٹن: امریکہ کی نائب صدر کملا ہیرس نے ڈیموکریٹ پارٹی کی صدارتی امیدوار نامزد ہونے کے لیے مطلوبہ حمایت حاصل کرنے کا دعویٰ کر دیا۔
غیر ملکی خبر رساں ایجنسی کے مطابق ڈیموکریٹ پارٹی کی ممکنہ صدارتی امیدوار کملا ہیرس نے دعویٰ کیا ہے کہ ڈیموکریٹ کا صدارتی امیدوار نامزد ہونے کے لیے مطلوب حمایت حاصل کر لی۔
انہوں نے کہا کہ جب میں نے صدارتی انتخاب لڑنے کا اعلان کیا تو اسی وقت کہہ دیا تھا کہ نامزدگی جیتوں گی۔ مجھے اس بات پر اور بھی فخر ہے کہ اپنی ریاست کیلیفورنیا کے وفد نے انتخابی مہم کوعروج پر پہنچایا۔
یہ بھی پڑھیں: امریکی صدر نے پاکستان کیلئے10کروڑ 10 لاکھ ڈالر امداد کی درخواست کی، ڈونلڈ لو
کملا ہیرس نے کہا کہ وہ اب باضابطہ طور پر ڈیموکریٹ صدارتی امیدوار کی نامزدگی قبول کرنے کی منتظر ہیں۔ صدر جوبائیڈن اور ہر اس شخص کی شکر گزار ہوں جنہوں نے اعتماد کا اظہار کیا۔
انہوں نے کہا کہ میں منتظر ہوں کہ اپنا مقدمہ عوام تک لے جاؤں۔ یہ انتخابات دو ویژنز کے درمیان واضح چوائس ہو گا۔ ڈونلڈ ٹرمپ امریکہ کو اس جگہ پر واپس لے جائیں گے جب ہم میں سے کئی کے پاس برابر حقوق نہیں تھے اور مکمل آزادی بھی نہیں تھی۔
امریکی نائب صدر نے کہا کہ اگلے چند مہینوں میں ملک کے مختلف حصوں کا دورہ کرنے کا ارادہ رکھتی ہوں اور ان امور پر بات کروں گی جن کے بارے میں خدشات ہیں۔ ڈیموکریٹ پارٹی اور قوم کو متحد کرنے کا ارادہ رکھتی ہوں اور ڈونلڈ ٹرمپ کو نومبر میں ہرانے کا تہیہ کیے ہوئے ہوں۔