لاہور میں ڈرامہ نگار خلیل الرحمان قمر کے ساتھ ڈکیتی اور اغوا کا مقدمہ درج

لاہور میں معروف ڈرامہ نگار خلیل الرحمان قمر کے ساتھ ڈکیتی اور اغواء کا واقعہ پیش آیا ہے جس کا مقدمہ درج کر لیا گیا ہے۔

اتوار کو لاہور کے مضافاتی علاقے سُندر میں پولیس نے واقعے کا مقدمہ خلیل الرحمان کے بیان پر درج کر لیا ہے۔

ایف آئی آر کے مطابق ’آمنہ نامی خاتون نے خلیل الرحمان کو فون کرکے بلایا کہ وہ ڈرامہ بنانا چاہتی ہے۔ گھر پہنچنے پر مسلح افراد نے واردات کی اور اغوا کرلیا۔‘

ایف آئی آر کے متن کے مطابق ’ملزمان تشدد کرتے رہے اور مختلف جگہوں پر گھومتے رہے۔ ملزمان نے جان سے مارنے کی دھمکیاں دیتے ہوئے رشتے داروں سے پیسے منگوانے کا کہا۔‘

مزید لکھا گیا کہ ’ملزمان نے موبائل، گھڑی اور نقدی چھینی، اے ٹی ایم کارڈ سے اڑھائی لاکھ سے نقدی ٹرانسفر کی اور ملزمان آنکھوں پر پٹیاں باندھ کر ویران جگہ چھوڑ کر فرار ہوگئے۔‘