’توبہ توبہ‘: پاکستانی کھلاڑیوں کا ’مذاق‘ یا کچھ اور۔۔۔ ہربھجن، یوراج اور سریش رائنا کی ویڈیو پر تنقید کیوں؟

ورلڈ چیمپئنز لیجنڈز فائنل میں پاکستان کو شکست دینے کے بعد انڈین ٹیم کے کھلاڑی اور سابق انڈین کرکٹر ہربھجن سنگھ نے اپنے انسٹاگرام پر ایک ویڈیو پوسٹ کی جس میں ان کے علاوہ یوراج سنگھ، سریش رائنا ’کال‘ فلم کے گانے ’توبہ توبہ‘ پر ایسے لنگڑاتے ہوئے چلنے کی اداکاری کر رہے ہیں جیسے جم میں ’لیگ ڈے‘ (ٹانگوں کی ورزش) کے بعد میرا حال ہوتا ہے۔

انسٹاگرام پوسٹ جسے اب ہٹا دیا گیا، اس میں ہربھجن نے اداکار وکی کوشل (جن پر یہ گانا فلمایا گیا ہے) کو ٹیگ کرتے ہوئے لکھا ’لیجنڈز کرکٹ کے 15 دنوں میں باڈی کی توبہ توبہ ہو گئی ہے۔۔۔ جسم کا انگ انگ دکھ رہا ہے۔‘

ہربھجن کی اس ویڈیو پر شدید تنقید کی جا رہی ہے اور کئی صارفین کا ماننا ہے کہ انھوں نے اس ویڈیو سے معذور افراد کا مذاق اڑایا ہے۔

https://twitter.com/mufaddal_vohra/status/1812454404924313649

انڈیا کی ایک ٹانگ سے محروم پارا بیڈمنٹن سٹار مناسی جوشی نے ہربھجن اور سریش رائنا کے اس اقدام کو ’بے حس‘ قرار دیتے ہوئے ان پر کڑی تنقید کی ہے۔

انھوں نے اپنی مایوسی کا اظہار کرتے ہوئے کہا کہ کھلاڑیوں کے اس ایکشن نے معذور افراد کے جذبات کو بہت ٹھیس پہنچائی ہے۔

مناسی نے لکھا کہ آپ جیسے کھلاڑیوں سے ذمہ دارانہ رویے کی توقع تھی۔ یہ کوئی مذاق نہیں ہے، معذور افراد کی توہین نہ کریں۔

مناسی نے لکھا ’آپ کی اس ریل سے لوگوں کی حوصلہ افزائی ہو گی کہ معذور افراد کا مذاق اڑانے میں کوئی ہرج نہیں ہے۔۔۔ اس ریل کا استعمال کرتے ہوئے کئی معذور بچوں اور نوجوانوں کو تنگ کیا جائے گا۔‘

بات محض تنقید تک ہی محدود نہیں رہی اور معذور افراد کے حقوق کے لیے کام کرنے والے گروپ نے توبہ توبہ ویڈیو وائرل ہونے کے بعد ان کرکٹرز کے خلاف شکایت درج کروا دی ہے۔

https://twitter.com/armanaly/status/1812844123986051089

سریش نکھا نامی صارف نے لکھا کہ ’ایک معذور شخص ہونے کے طور پر مجھے لگتا ہے کہ یہ ویڈیو جان بوجھ کر معذور افراد کی توہین اور تذلیل کرتی ہے اور یہ معذور افراد کے حقوق کے قانون 2016 کے سیکشن 92 کی خلاف ورزی ہے اور اس کی سزا پانچ سال تک قید ہے۔‘

https://twitter.com/RichKettle07/status/1812512456469815698

تاہم کئی انڈین و پاکستانی صارفین کا ماننا ہے کہ یہ ویڈیو ورلڈ چیمپئنز لیجنڈز میں شامل پاکستانی کھلاڑیوں کا مذاق اڑانے کی غرض سے بنائی گئی ہے۔

رچرڈ کیٹلبرو نے پوچھتے ہیں کہ کیا وہ موجودہ پاکستانی فاسٹ باؤلنگ یونٹ کا مذاق اڑا رہے ہیں جو ہردو ماہ بعد انجرڈ ہو جاتے ہیں؟

ہربھجن نے ایک بیان میں معافی مانگتے ہوئے کہا ہے ان کا مقصد کسی کی دل آزاری نہیں تھا۔

ان کا کہنا ہے کہ ہم ہر انسان اور کمیونٹی کا احترام کرتے ہیں اور اس ویڈیو کا مقصد صرف یہ دکھانا تھا کہ 15 دن کرکٹ کھیل کھیل کر ہمارے جسم کا کیا حال ہوتا ہے۔

ہربھجن کا کہنا ہے ہمارا ارادہ کسی کی توہین یا دل آزاری نہیں تھا لیکن اگر آپ کو لگتا ہے کہ ہم نے کچھ غلط کیا ہے تو میں اپنی طرف سے معافی مانگتا ہوں اور اب اس بات کو یہیں ختم کریں۔