’کبھی الوداع نہ کہنا‘ میں شاہ رخ خان نے میرا کردار کاپی کیا، توقیر ناصر کا دعویٰ

پاکستان کے سینیئر اداکار توقیر ناصر نے دعویٰ کیا ہے کہ شاہ رخ خان نے فلم کبھی الوداع نہ کہنا میں ان کا کردار کاپی کیا ہے۔

ہندوستان ٹائمز کے مطابق یوٹیوب شو میں بات کرتے ہوئے توقیر ناصر نے دعویٰ کیا کہ ان کے ڈرامہ سیریل پرواز کے کردار اور شاہ رخ خان کے کبھی الوداع نہ کہنا میں کردار کے درمیان براہ راست تعلق ہے۔

توقیر ناصر کہتے ہیں کہ ’ایک فلم شاہ رخ خان نے میری کی ہے۔ وہ پرواز ڈرامے کا سارا کردار ان نے ہو بہو کیا۔ میں اس بات کو سراہتا ہوں لیکن اس (شاہ رخ خان) کو کریڈٹ دینا چاہیے تھا۔‘

انہوں نے کہا کہ ’کرن جوہر کو کریڈٹ دینا چاہیے تھا۔‘

انہوں نے مزید کہا کہ ’اس کی ٹانگ میں بھی لنگڑا پن ہے۔ یہ کردار پیچیدہ ہے کیونکہ اسے دو انتہاؤں میں سے ایک کو چننا ہے، جہاں وہ ایک کو پسند کرتا ہے اور دوسری طرف جہاں وہ پسند کیا جاتا ہے۔‘

توقیر ناصر نے مزید کہا کہ ’کبھی الوداع نہ کہنا کو تھوڑا فلمی انداز میں دکھایا گیا ہے لیکن اس کی کہانی ایک جیسی ہی ہے۔‘

خیال رہے کہ فلم کبھی الوداع نہ کہنا 2006 میں ریلیز ہونے والی رومانس ڈرامہ فلم تھی جس کی مرکزی کاسٹ میں شاہ رخ خان، رانی مکھرجی، امیتابھ بچن، پریتی زنٹا اور ابھیشیک بچن شامل تھے۔

اس فلم کی ہدایات کاری کرن جوہر نے کی۔