لاہور۔12جون (اے پی پی):انسپکٹر جنرل پولیس پنجاب ڈاکٹر عثمان انور کی جانب سے فورس کی ہیلتھ ویلفیئر کے سلسلے میں جاری اقدامات کے تحت پولیس ملازمین کے 3مزید بچوں کی کوکلیئر امپلانٹ سرجری کے بعد قوت سماعت بحال ہو گئی ہے۔آئی جی پنجاب نے روبصحت بچوں اور انکے والدین سے سنٹرل پولیس آفس میں ملاقات کی اور ان سے سرجری کے بعد جاری علاج بارے دریافت کیا۔اس موقع پر آئی جی پنجاب نے ڈی آئی جی ویلفیئر پنجاب سے ملازمین کے بچوں کے علاج معالجے کے اقدامات بارے گفتگوکی۔انہوں نے کہاکہ پولیس ملازمین کے مختلف عارضوں کا شکار 2 ہزار سے زائد بچوں کو علاج معالجے میں بھرپور معاونت فراہم کی جا رہی ہے،پیدائشی طور پر قوت سماعت و گویائی سے محروم بچوں کو سرجری کے بعد روبصحت دیکھ کے بے حد مسرت ہوئی۔انہوں نے کہاکہ قوت سماعت سے محروم 18 بچوں کی کوکلئیر امپلانٹ سرجری کروائی گئی جبکہ 176بچوں کو ہیرنگ ایڈز فراہم کی گئیں۔ انہوں نے کہاکہ پنجاب پولیس نے قوت سماعت سے محروم بچوں کی کوکلئیر امپلانٹ سرجری پر 03کروڑ 26لاکھ روپے خرچ کئے گئے۔ڈاکٹر عثمان انور نے کوکلیئر امپلانٹ سرجری سے روبصحت بچوں فضا، نمرہ، ہادی اور انکے والدین سے گفتگو کی۔بچوں کے والدین نے اظہار تشکر کرتے ہوئے کہاکہ قوت گویائی کی بحالی کے لئے سپیچ تھراپی بھی جاری ہے اور ہر گزرتے دن کے ساتھ بچوں کی حالت مزید بہتر ہو رہی ہے۔پولیس ملازمین کے بچوں کی ہیلتھ ویلفیئر کیلئے جاری اقدامات میں دماغی فالج (سیریبل پالسی)کا شکار 550اور تھیلیسمیا سے متاثرہ 150سے زائد بچوں کو علاج معالجے میں معاونت کے ساتھ ساتھ ماہانہ وظائف بھی فراہم کئے جا رہے ہیں تاکہ انہیں علاج معالجے میں کسی مشکل کا سامنا نہ کرنا پڑے۔