پنجاب یونیورسٹی ، مستحق طلبہ کو سکالرشپ فراہم کرنے کیلئے انٹرویوز شروع

لاہور۔7جون (اے پی پی):پنجاب یونیورسٹی نے مستحق طلبہ کو ہایئر ایجوکیشن کمیشن کی طرف سے سکالرشپ فراہم کرنے کے لئے انٹرویوز شروع کر دیئے ۔ ترجمان کے مطابق اس سلسلے میں وائس چانسلر پروفیسر ڈاکٹر خالد محمود کی زیر صدارت اجلاس منعقدہوا ،جس میں ڈائریکٹر پلاننگ اینڈ ڈویلپمنٹ ڈاکٹر حافظ انوار، راجہ منوراور خزانہ دار آفس عملے نے شرکت کی۔

ڈاکٹر خالد محمود نے کہا کہ پنجاب یونیورسٹی اپنے باصلاحیت طلبہ کو تعلیمی سفر جاری رکھنے میں بھرپور مدد فراہم کرے گی۔انہوں نے کہا کہ مالی وسائل میں کمی کے باوجود پنجاب یونیورسٹی سے فارغ التحصیل افراد دنیا بھر میں اپنی صلاحیتوں کا لوہا منوا رہے ہیں۔انہوں نے کہا کہ پنجاب یونیورسٹی انتظامیہ کی تعلیم دوست پالیسیوں کی بدولت بین الاقوامی کیو ایس رینکنگ کے ادارے نے یونیورسٹی کو ایشیاء میں سب سے زیادہ ترقی والی یونیورسٹی قرار دیا ہے۔