آپس میں جڑی فلپائنی بچیوں کا سعودی عرب کے ہسپتال میں کامیاب آپریشن

ریاض ۔7جون (اے پی پی):سعودی عرب کے دارالحکومت ریاض میں کنگ عبد اللہ میڈیکل سٹی کی طبی ٹیم نے ڈاکٹر عبد العزیز الربیعہ کی سربراہی میں جڑے ہوئے فلپائنی سیامی بچیوں کو علیحدہ کرنے کاکامیاب آپریشن کیا۔ اردو نیوز کے مطابق میڈیکل ٹیم نے کہا ہے کہ فلپائنی سیامی بچیاں عائشہ اور اکیزا کو علیحدہ کرنے کا آپریشن انتہائی آسان تھا۔ ہسپتال سے گزشتہ روز جاری ہونے والی وڈیو میں دیکھا جاسکتا ہے کہ ڈاکٹر عبد العزیز الربیعہ دونوں بچیوں کو ان کی ماں کے حوالے کر رہے ہیں۔

ڈاکٹر عبد اللہ بن عبد العزیز الربیعہ کی سربراہی میں 23 افراد پر مشتمل طبی عملے نے آپریشن کیا۔ آپس میں جڑی بچیوں کو 5 مراحل میں علیحدہ کیا گیا جس میں مجموعی طور پر 7 گھنٹے لگنے تھے تاہم آپریشن 5 گھنٹوں میں مکمل ہوگیا۔ یاد رہے کہ سعودی عرب میں سیامی بچوں کو علیحدہ کرنے کا یہ 61 واں آپریشن ہے۔