متحدہ عرب امارات میں پاکستانی سفیر فیصل نیاز ترمذی کی شیخ شخبوت میڈیکل سٹی آمد، آتشزدگی کے واقعہ میں زخمی ہونے والے پاکستانی مریضوں کی عیادت 

ابو ظہبی ۔6جون (اے پی پی):متحدہ عرب امارات میں پاکستان کے سفیر فیصل نیاز ترمذی نے عجمان کی ایک فیکٹری میں آتشزدگی کے نتیجے میں زخمی ہونے والے پاکستانی مریضوں کی عیادت کے لیے ابوظہبی میں شیخ شخبوت میڈیکل سٹی (ایس ایس ایم سی) کا دورہ کیا اور کہاکہ اللہ تعالی کے فضل و کرم سے یہ مریض اب صحت یاب ہو چکے ہیں اور انہیں جلد ہی پاکستان منتقل کر دیا جائے گا۔

جمعرات کو پاکستان ایمبیسی کی طرف سے جاری پریس ریلیز کے مطابق سفیرفیصل نیاز ترمذی نے ہر زخمی مریض کی عیادت کی اور ان کی مکمل صحت یابی کے لیے نیک خواہشات اور دعائوں کا اظہار کیا اور انہیں پاکستان مشن کی جانب سے ان کی پاکستان آمد ورفت میں سہولت فراہم کرنے کے عزم کا یقین دلایا۔

فیصل نیاز ترمذی نے ایس ایس ایم سی میں ڈاکٹروں اور پیرا میڈیکل اسٹاف سے بھی ملاقات کی۔ انہوں نے ایس ایس ایم سی کی ٹیم کا آتشزدگی کے واقعہ میں زخمی ہونے والے افراد کے علاج کے لئے چوبیس گھنٹے انتھک کوششوں پر شکریہ ادا کیا۔

پاکستانی سفیر نے ڈاکٹروں اور پیرا میڈیکل اسٹاف کو ان کی پیشہ ورانہ مہارت اور پیشہ ورانہ کاوشوں کے اعتراف میں تعریفی خطوط پیش کیے۔ انہوں نے متحدہ عرب امارات کی حکومت کا بھی ہر ممکن تعاون پر شکریہ ادا کیا۔