بیجنگ۔6جون (اے پی پی):وزیراعظم محمد شہباز شریف نے کہا ہے کہ پاکستان میں متبادل توانائی کے شعبہ میں سرمایہ کاری کی بڑی گنجائش ہے، متبادل توانائی کے نظام کو مضبوط بنانا ہماری اولین ترجیح ہے ۔ جمعرات کو وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے چیئرمین پاور چائنہ ڈنگ یانزانگ سے گفتگو کرتے ہوئے کیا جنہوں نے ان سے ملاقات کی۔ ملاقات میں نائب وزیراعظم و وزیر خارجہ اسحاق ڈار ، وفاقی وزیر دفاع خواجہ آصف ، وفاقی وزیر منصوبہ بندی احسن اقبال ، وفاقی وزیر اطلاعات و نشریات عطاء اللہ تارڑ ، وفاقی وزیر پاور اویس احمد خان لغاری اور وزیراعظم کے معاون خصوصی طارق فاطمی موجود تھے۔وزیراعظم نے کہا کہ متبادل توانائی کا نظام مضبوط کرنا ہماری اولین ترجیح ہے ، پاکستان میں متبادل توانائی کے حوالے سے سرمایہ کاری کی بڑی استعداد ہے ۔ انہوں نے کہا کہ بجلی چوری کے حوالے سے ملک میں بڑی کارروائیاں کی جا رہی ہیں ۔اس موقع پر چیئرمین پاور چائنہ ڈنگ یانزانگ نے ساہیوال کول پاور پلانٹ کی تیز رفتار تعمیر اور معیار کی تعریف کی اور انہوں نے پاکستان اور پنجاب سپیڈ کا بھی ذکر کیا۔انہوں نے کہا کہ پاکستان کے ساتھ مفاہمتی یادداشت پر دستخط کئے جائیں گے جس کے تحت پاکستان میں بجلی ترسیل کا نظام بہتر اور لائن لاسز کو کم کیا جائے گا ۔