اسلام آباد میں الیکٹرک بسیں پہنچنا شروع ہو گئیں

اسلام آباد۔5جون (اے پی پی):اسلام آباد میں الیکٹرک بسیں منگل کے روز سے پہنچنا شروع ہو گئیں۔ تفصیلات کے مطابق 160 میں سے 30 الیکٹرک بسیں پاکستان پہنچ چکی ہیں جن میں سے کراچی سے 8 بسیں اسلام آباد، جناح کنونشن سینٹر، چارجنگ پوائنٹ پر پہنچ چکی ہیں جبکہ 22 بسیں بدھ تک اسلام آباد پہنچ جائیں گی۔ابتدائی طور پر یہ 30 بسیں دو روٹس پر چلائی جائیں گی، ایک روٹ نسٹ، اورنج لائن ڈپو، G-11 تا سے پمز ہسپتال تک ہوگا، جس میں بس G-11 مرکز، G-10 مرکز، G-9 مرکز اور G-8 سے ہوتی ہوئی پمز تک پہنچے گی۔ پہلا روٹ 13 سٹاپس پر مشتمل ہوگا اور ہر دس منٹ بعد سٹاپ پر بس پہنچا کرے گی۔

دوسرا روٹ پمز سے شروع ہوکر بری امام تک ہوگا۔ دوسرے روٹ میں یہ سروس G-7، G-6، میلوڈی، آبپارہ، اتاترک روڈ، سرینہ ہوٹل، فارن آفس، ریڈیو پاکستان، ڈپلومیٹک انکلیو سے بری امام تک جائے گی، یہ سروس صبح 6 بجے تا رات 10 بجے تک استعمال کی جاسکے گی، چیئرمین سی ڈی اے کی ہدایت پر مستحق طبقات بشمول معزور افراد، طلباء و دیگر کو سبسڈی دینے کے لئے بھی طریقہ کار وضع کیا جائے گا۔