روم۔5جون (اے پی پی):وفاقی وزیرداخلہ و انسداد منشیات محسن نقوی اور وفاقی وزیر سمندر پار پاکستانیز و ترقی انسانی وسائل چودھری سالک حسین نے اٹلی کے وزیر داخلہ میٹیو پینٹے ڈوسی سے ملاقات کی ہے۔۔اطالوی وزارت داخلہ آمد پر اعلی حکام نے وفاقی وزراء کا پرتپاک خیر مقدم کیا۔ملاقات میں غیر قانونی امیگریشن اور انسانی سمگلنگ روکنے کے لئے مشترکہ اقدامات پر تبادلہ خیال کیا گیا۔ انسداد منشیات اور بارڈر سیکورٹی کے حوالے سے تعاون پر بھی تفصیلی بات چیت ہوئی۔ ملاقات میں غیر قانونی تارکین وطن اور انسانی سمگلنگ کیخلاف مربوط اور موثر لائحہ عمل پر اتفاق کیا گیا۔انسداد منشیات اور بارڈر سیکورٹی کے لئے مشترکہ اقدامات اٹھائے جائیں گے۔ ملاقات میں مشترکہ طور پر قریبی کوآرڈینیشن کے تحت کام کرنے کا فیصلہ کیا گیا۔ انسداد منشیات اور انسانی سمگلنگ روکنے کےلئے اٹلی کی پاکستانی بارڈرز کو محفوظ بنانے کیلئے معاونت پر غور کیا گیا، اطالوی ٹیم اس ضمن میں جلد پاکستان کا دورہ کرے گی۔وفاقی وزیر داخلہ محسن نقوی نے اٹلی میں 146 پاکستانی قیدیوں کے حوالے سے بات کی جبکہ 42 پاکستانی قیدیوں کو پاکستان کے حوالے کرنے کا بھی مطالبہ کیا۔وفاقی وزیرداخلہ محسن نقوی نے اطالوی ہم منصب کو پاکستان کے دورے کی دعوت دی۔انہوں نے کہا کہ مضبوط باہمی اشتراک کار انسانی سمگلنگ روکنے، انسداد منشیات اور بارڈر سیکورٹی کے لئے مددگار ثابت ہو گا۔ انہوں نے مزید کہا کہ غیر قانونی طور پر اٹلی جانے والے پاکستانیوں کا داخلہ روکنے اور انسداد منشیات کے لئے ہر سطح پر اقدامات کئے گئے ہیں، انسانی سمگلنگ اور ڈرگ مافیا کے خلاف زیرو ٹالرنس کی پالیسی اپنائی ہے۔ وفاقی وزیر سمندر پار پاکستانیز وترقی انسانی وسائل چودھری سالک حسین نے کہا کہ اٹلی پاکستان کی ہنر مند افرادی قوت سے بھرپور فائدہ اٹھا سکتا ہے۔انہوں نے کہا کہ اٹلی پاکستان کے ساتھ ہنرمند افرادی قوت کے زیر التوا معاہدہ کو جلد حتمی شکل دے تاکہ غیر قانونی امیگرنٹس کی حوصلہ شکنی ہو۔ اطالوی وزیر داخلہ نے انسانی سمگلنگ کی روک تھام اور انسداد منشیات کے لیے وفاقی وزیرداخلہ محسن نقوی کے اقدامات کو سراہا۔ اطالوی وزیر داخلہ کی انسداد منشیات، بارڈر سیکورٹی اور انسانی سمگلنگ روکنے کے لئے بھرپور تعاون کی یقین دہانی۔ اس موقع پر اٹلی میں پاکستان کے سفیر علی جاوید اور اطالوی وزارت داخلہ کے اعلی حکام بھی موجود تھے۔