اسلام آباد۔4جون (اے پی پی):گورنر خیبر پختونخوا فیصل کریم کنڈی سے منگل کو چیئرمین ہائیر ایجوکیشن کمیشن ڈاکٹر مختار احمد نے ملاقات کی جس میں خیبر پختونخوا میں ہائیر ایجوکیشن کے شعبے کی ترقی اور یونیورسٹیوں میں بین الاقوامی معیار کے مطابق تعلیم کی فراہمی کے متعلق امور پر تفصیلی تبادلہ خیال کیا گیا ۔گورنر خیبر پختونخوا نے چیئرمین ایچ ای سی کو ہدایت کی کہ صوبے میں ہائر ایجوکیشن کی بہتری کے لیے موثر اقدامات اور طالب علموں کے لیے بین الاقوامی معیار کے مطابق تعلیمی سہولیات کی فراہمی کو یقینی بنانے کے لیے موثر اقدامات کیے جائیں۔انہوں نے گومل یونیوسٹی کو در پیش مسائل اور مشکلات کے متعلق بھی بات کی اورکہا کہ یونیورسٹی کے تعلیمی معیار کو بہتر بنانے اوران کے مسائل کو حل کرنے کے لیے موثر اقدامات کیے جائیں ۔ ا س کے علاوہ انہوں نے صوبے کے طالب علموں کے لیے سکالرشپ بڑھانے کے لیے کہا ۔گورنر خیبر پختونخوا کا کہنا تھا کہ ہمارے ملک کا روشن مستقبل باصلاحیت نوجوانوں کے ہاتھوں میں محفوظ ہے،نوجوان ہمارا قیمتی اثاثہ ہیں جن کو درست رہنمائی اور اعلی تعلیم کی معیاری سہولیات فراہم کرنا ہم سب کی مشترکہ ذمہ داری ہے۔انہوں نے کہا کہ طالب علموں کو جدید طریقوں سے روشناس کروایا جائے تاکہ وہ اپنی پیشہ وارانہ زندگی میں بہتر کارکردگی کا مظاہرہ کر سکیں۔