گورنر پنجاب سردار سلیم حیدر خان سے گورنر خیبر پختونخوا فیصل کریم کنڈی کی ملاقات،صوبوں کے درمیان رابطوں کو فروغ دینے کے عزم کا اعادہ

لاہور۔1جون (اے پی پی):گورنر پنجاب سردار سلیم حیدر خان سے گورنر ہائوس لاہور میں گورنر خیبر پختونخوا فیصل کریم کنڈی نے ملاقات کی۔دونوں ہم منصبوں نے ایک دوسرے کو گورنر کا عہدہ سنبھالنے پر مبارکباد د ی ۔ دوونوں رہنمائوں نے صوبہ پنجاب اور صوبہ خیبر پختونخواکے درمیان رابطوں کو فروغ دینے کے عزم کا اعادہ کیا۔

اس موقع پرگفتگو کرتے ہوئے گورنر پنجاب سردار سلیم نے کہا کہ سب کو مل کر ملک کی ترقی اور استحکام کے لیے کردار ادا کرنا ہے۔گورنر پنجاب نے کہا کہ اپوزیشن سمیت تمام پارٹیوں کو ملک کی ترقی اور خوشحالی کے لئے ایک پیج پر ہونا چاہئے۔

انہوں نے کہا کہ یہ بڑی خوش آئند بات ہے کہ ملکی معیشت بہتری کی طرف گامزن ہے۔ گورنر پنجاب نے مزید کہا کہ وفاق اور صوبے کے درمیان رابطے بہتر بنانے میں مثبت کردار ادا کروں گا۔

گورنر خیبر پختونخوا فیصل کریم کنڈی نے کہا کہ صوبے کی بہتری،ترقی اور امن و امان ترجیح ہے۔ انہوں نے مزید کہا کہ صوبہ پنجاب اور کے پی کے کے درمیان عوامی سطح پر رابطے بڑھائیں گے۔