ایرانی سفارتخانے کے زیر اہتمام مرحوم ابراہیم رئیسی، حسین امیرعبداللہیان اور ان کے دیگر ساتھیوں کی یاد میں دعائیہ تقریب کا انعقاد

اسلام آباد۔29مئی (اے پی پی):پاکستان میں ایران کے سفارتخانہ نے ہیلی کاپٹر حادثے میں شہید ہونے والے ایران کے صدر سید ابراہیم رئیسی، وزیر خارجہ حسین امیرعبداللہیان اور ان کے دیگر ساتھیوں کی یاد میں دعائیہ تقریب کا انعقاد کیا۔ تقریب کی میزبانی ایران کے سفیر رضا امیری مقدم نے کی۔

تقریب میں پاکستان میں عراقی سفیر اور سیاسی اور مذہبی جماعتوں کے رہنماؤں اور زندگی کے مختلف شعبوں سے تعلق رکھنے والے لوگوں کی ایک بڑی تعداد نے شرکت کی۔ تقریب سے پاکستان میں ایران کے سفیر رضا امیری مقدم، ملی یکجہتی کونسل کے سربراہ ابو الخیر محمد زبیر اور دیگر مقررین نے اپنے خیالات کا اظہار کیا۔

مقررین نے ایرانی صدر اور ان کے ساتھیوں کی حادثاتی موت پر افسوس کا اظہار کرتے ہوئے انہیں زبردست الفاظ میں خراج عقیدت پیش کیا۔ اس موقع پر مرحومین کی مغفرت کے لئے دعا کی گئی۔