ریاض ۔29مئی (اے پی پی):خادم حرمین شریفین شاہ سلمان بن عبدالعزیز آل سعود کی ہدایت پر امسال ایک ہزار فلسطینیوں کی سرکاری سطح پرحج کی میزبانی کی جائے گی ،یہ فلسطینی جن کا تعلق شہدا، زخمیوں یا قیدیوں کےخاندانوں سے ہے ان 2,300 غیر ملکی مسلمانوں میں شامل ہیں جن کو سعودی عرب کی دعوت پر حج کی سعادت نصیب ہو گی۔ایس پی اے کے مطابق خادم حرمین شریفین شاہ سلمان نے رواں سال 2,300 غیر ملکی مسلمانوں کی سرکاری سطح پرحج کی میزبانی کی ہدایت کی ہے۔ سعودی عرب کی سرکاری دعوت پر فریضہ حج ادا کرنے والے خوش نصیبوں کا تعلق 88 ممالک سے ہے جب کہ ان میں ایک ہزار فلسطینی بھی شامل ہیں ،اس کے علاوہ 22 ایسے مسلمانوں کی سعودی عرب کی میزبانی میں حج کی تیاریوں کی ہدایت کی گئی ہے جن کے جڑواں بچوں کے آپریشن مملکت کے ہسپتالوں میں ہوئے ہیں۔خیال رہے کہ سعودی عرب میں سرکاری حج سکیم کے تحت بیرون ملک سے ہر سال سینکڑوں مسلمانوں کے حج کا انتظام کیا جاتا ہے۔اس پروگرام کو سعودی وزارت مذہبی امور اور دعوت ارشاد سر انجام دیتی ہے۔اس موقع پر مذہبی امور اور دعوت و ارشاد کے وزیر اور پروگرام کے جنرل سپروائزر الشیخ ڈاکٹر عبداللطیف بن عبدالعزیز آل الشیخ نے کہا کہ سعودی قیادت کی طرف سے 2300 مسلمانوں کے حج کی سرکاری سطح پر میزبانی خادم حرمین شریفین اور ولی عہد شہزادہ محمد بن سلمان کی دنیا بھر کے مسلمانوں کے مفادات کی دیکھ بھال کے لیے ان کے مستقل فکر کی عکاسی ، مختلف خطوں کے مسلمانوں کے ساتھ محبت، اسلامی اتحاد اور بھائی چارے کے بندھن کو گہرا کرنے کی مساعی کا حصہ ہے،یہ میزبانی اسلام اور مسلمانوں کی خدمت میں قیادت کی طرف سے کی گئی عظیم خدمات اور مسلمانوں کے مقدس ترین مقام بیت اللہ شریف کی میزبانی کےحوالے سے اسلامی دنیا میں مملکت کے اس اہم مقام کو بھی اجاگر کرتی ہے۔