اسلام آباد کے شہریوں کی سہولت کیلئے پانچ سروسز کے اجرا کا اعلان، اسلام آباد کو ایک مثالی شہر بنائیں گے، وزیرداخلہ محسن نقوی

اسلام آباد۔28مئی (اے پی پی):وفاقی وزیرداخلہ محسن نقوی نے اسلام آباد کے شہریوں کی سہولت کیلئے 5 سروسز کے اجرا کا اعلان کرتے ہوئے کہا ہے کہ تمام اقدامات کا مقصد اسلام آباد کے شہریوں کو بہترین اور تیز رفتار خدمات فراہم کرنا ہے، جلد اسلام آباد کو ایک مثالی شہر بنائیں گے۔ وہ سی ڈی اے کے دورہ کے موقع پر دی گئی اجلاس سے خطاب کررہے تھے۔ وزیر داخلہ محسن نقوی نے اسلام آباد میں کیپیٹل ایمرجنسی سروسزکے اجراء ،کیپیٹل ویسٹ مینجمنٹ کمپنی، کیپیٹل سیف سٹی اتھارٹی،سی بی ڈی اسلام آباد اورکیپٹل واسا کا قیام عمل میں لایا جائے گا۔

وفاقی وزیرداخلہ محسن نقوی نے چئیرمین سی ڈی اے و چیف کمشنر اسلام آباد محمد علی رندھاوا کو ٹاسک دے دیا۔وفاقی وزیر نے سی ڈی اے ہیڈکوارٹر کے دورے کے دوران ایمبولینس 1122 اور فائر بریگیڈ کے عملے سے ملاقات کی اور جانفشانی سے فرائض کی ادائیگی کی تلقین کی۔سی ڈی اے ایمرجنسی سروس کے ڈاکٹر عبد الرحمان نے بریفنگ میں بتایا گیا کہ ایمبولینس، فائر بریگیڈ اور واٹر ریسکیو سروس کو کیپٹل ایمرجنسی سروسز کے تحت یکجا کیا جائے گا۔شہری کسی بھی ہنگامی حالت کی صورت میں 1122 پر کال کر کے ایمرجنسی سروسز حاصل کر سکیں گے۔یونیفائیڈ ایمرجنسی کنٹرول روم کا قیام عمل میں لایا جائے گا۔

گاڑیوں کی جی پی ایس کے ذریعے لائیو ٹریکنگ کی جائے گی۔ وزیر داخلہ محسن نقوی کا کہنا تھا کہ عملے کی ٹریننگ پر خصوصی توجہ دی جائے گی۔ انہوں۔ نے شہر میں ایمرجنسی سروسز 1122 کے نئے سٹیشن قائم کرنے اور منظور شدہ خالی آسامیوں پر میرٹ پر بھرتیوں کی ہدایت دی۔ انہوں نے کہا کہ اسلام آباد میں ایمبولینسز کی تعداد میں اضافہ کیا جائے گا۔چئیرمین سی ڈی اے و چیف کمشنر اسلام آباد محمد علی رندھاوا، ڈپٹی کمشنر اسلام آباد عرفان میمن اور ایمرجنسی سروسز سے ڈاکٹر عبد الرحمان اوردیگر حکام بھی اس موقع پر موجود تھے۔