اسلام آباد۔27مئی (اے پی پی):وفاقی وزیر خزانہ محمد اورنگزیب سے امریکی سفیر ڈونلڈ بلوم نےپیر کو یہاں ملاقات کی جس میں پاک امریکہ تجارت، سرمایہ کاری اور اقتصادی تعلقات کے اہم پہلوئوں پر تبادلہ خیال کیا گیا۔
اسلام آباد میں امریکی سفارتخانے کے قائم مقام ترجمان تھامس مونٹگمری کے مطابق امریکی سفیر ڈونلڈ بلوم نے ملاقات کے دوران پاکستان کے معاشی اصلاحات کے ایجنڈے کے لیے جاری امریکی حمایت پر روشنی ڈالی۔ سفیر نے کہا کہ امریکہ پاکستان کے ساتھ تکنیکی اور ترقیاتی شعبوں میں کام کرنے کے لیے پرعزم ہے۔
انہوں کہا کہ امریکہ پاکستان کی سب سے بڑی برآمدی منڈی، اعلیٰ معیار کی سرمایہ کاری کا ایک بڑا ذریعہ اور پاکستان کے معاشی مستقبل کے لیے ایک مضبوط پارٹنر ہے۔