سعودی عرب، شہریوں اور رہائشیوں کو جعلی حج اشتہارات سے محتاط رہنے کی ہدایت

ریاض ۔12مئی (اے پی پی):سعودی عرب نے شہریوں اور رہائشیوں کو جعلی حج اشتہارات سے محتاط رہنے کی ہدایت کردی ۔ العربیہ کے مطابق مملکت میں عوامی سکیورٹی کے ادارے نے کہا ہے کہ وہ سوشل میڈیا سائٹس پر دوسروں کی جانب سے حج کرنے، ضیوف الرحمان کے لیے قربانیاں محفوظ و تقسیم کرنے، حج سے متعلق کڑے فروخت کرنے، نقل و حمل کے ذرائع کو محفوظ بنانے اور دیگر گمراہ کن اشتہارات سے خبردار رہیں اور ایسے اشتہارات کا جواب نہ دیں۔

سعودی حکام نے واضح کیا کہ قربانیوں کا سعودی پراجیکٹ ایک سرکاری اتھارٹی کے ذریعے رو بہ عمل ہوتاہے، صرف یہی اتھارٹی قربانیوں، فدیوں اور خیرات کے حوالے سے تشہیر کرنے کی مجاز ہے اور اسی اتھارٹی سے قربانی کے جانوروں کو خریدا جا سکتا ہے۔ اتھارٹی کی باضابطہ ویب سائٹ ’’adahi.org‘‘ ہے۔