وزیراعلی خیبر پختونخوا کی نوشکی میں مسافروں کو اغوا کرکے قتل کرنے کے واقعے کی مذمت

پشاور۔ 13 اپریل (اے پی پی):وزیراعلی خیبر پختونخوا سردار علی امین گنڈاپور نے نوشکی میں مسافروں کو اغوا کرکے قتل کرنے کے واقعے کی مذمت کرتے ہوئے اس واقعے میں 11 مسافروں کے قتل پر افسوس کا اظہار کیا ہے۔

اپنے بیان میں وزیراعلی خیبر پختونخوا علی امین گنڈاپور نے سوگوار خاندانوں سے دلی ہمدردی اور تعزیت کا اظہار کرتے ہوئے جاں بحق افراد کی مغفرت اور پسماندگان کےلئے صبر جمیل کی دعا کی۔انہوں نے کہا کہ واقعہ انتہائی افسوس ناک اور قابل مذمت ہے، واقعے کی جتنی مذمت کی جائے کم ہے،معصوم اور بے گناہ لوگوں کو نشانہ بنانا غیر انسانی فعل ہے۔ انہوں نے کہا کہ سوگوار خاندانوں کے غم میں برابر کے شریک ہیں۔