سعودی عرب اور برطانیہ کے درمیان ڈپلومیٹک ٹریننگ کے معاہدے پر دستخط

ریاض۔4اپریل (اے پی پی):سعودی عرب اور برطانیہ نے ڈپلومیٹک ٹریننگ کے معاہدے پر دستخط کیے ہیں۔ ایس پی اے کے مطابق سعودی وزارت خارجہ کے بیان میں کہا گیا ہے کہ معاہدے میں شہزادہ سعود الفیصل انسٹی ٹیوٹ فار ڈپلومیٹک سٹیڈیز اور برطانیہ و شمالی آئر لینڈ کے ایف سی ڈی او کے درمیان تعاون کا پروگرام شامل ہے۔

اس معاہدے پر سعودی عرب کے نائب وزیرخارجہ ولید الخریجی اور برطانوی وزیر مملکت برائے مشرق وسطیٰ، شمالی افریقا، جنوبی ایشیا، دولت مشترکہ اور اقوام متحدہ لارڈ طارق نے وڈیو کال کے ذریعے ہونے والی ملاقات میں دستخط کیے ۔اس موقع پر دونوں ممالک نے کہا کہ اس پروگرام سے معلومات، تحقیقی سرگرمیوں اور تربیتی پروگراموں کے شعبے میں تعاون قائم کرنے اور مضبوط بنانے میں مدد ملے گی۔

لارڈ طارق احمد نے کہا کہ سعودی نائب وزیر خارجہ کے ساتھ ڈپلومیٹس ٹریننگ ایگریمنٹ پر دستخط کرنے پر خوشی ہے۔انہوں نے ایکس پوسٹ میں کہا کہ ہم نے غزہ میں لڑائی کو فوری طور پر روکنے کی ضرورت پر بھی تبادلہ خیال کیا جس میں دو ریاستی حل، سوڈان میں تنازعات کے حل کے ساتھ ترقیاتی تعاون لیے اقدامات شامل ہیں۔