امریکی صدر جوبائیڈن کے خلاف تحقیقات جاری ، 6 ہزار ای میلز ایوان نمائندگان کے ارکان کے حوالے

واشنگٹن ۔1اپریل (اے پی پی):امریکا کے صدر جو بائیڈن کے خلاف تحقیقات کے طور پر امریکی نیشنل آرکائیوز نےرواں ہفتے تقریباً چھ ہزار صفحات پر مشتمل ای میلز امریکی ایوانِ نمائندگان کی نگرانی کمیٹی کے حوالے کردیں۔العربیہ اردو کے مطابق ایوان نمائندگان میں ڈیموکریٹک پارٹی سے تعلق رکھنے والے ایک سینئر معاون نے بتایا کہ نیشنل آرکائیوز نے امریکی صدر اور ان کے بیٹے ہنٹر کے خاندان سے متعلق 20 ہزار سے زائد صفحات پر مشتمل ای میلز شائع کیں۔ویب سائٹ ایکسوس کے مطابق انہوں نے 75 ہزار سے زیادہ دیگر پیجز کا ریکارڈ بھی ہاؤس آف ریپبلکنز کے حوالے کیا۔

ای میلز میں کمیٹی کی جانب سے متعدد درخواستوں کا احاطہ کیا گیا ،ان میں وہ دستاویزات جن میں اس وقت کے نائب صدر جو بائیڈن کا تخلص استعمال کیا گیا تھا بھی شامل ہیں،ان میں جو بائیڈن کی 2015 میں یوکرین کی مقننہ میں تقریر کا مسودہ اور ہنٹر بائیڈن یا اس کے کاروباری ساتھیوں کے ساتھ ان کی بات چیت بھی شامل ہے۔

ایوان نمائندگان کے ایک سینئر ڈیموکریٹک معاون نے ایکسوس کو بتایا کہ نیشنل آرکائیوز نے عوامی طور پر ہنٹر بائیڈن اور بائیڈن فیملی سے متعلق 20 ہزار صفحات پر مشتمل ای میلز جاری کیں جبکہ مزید 75ہزارپیجز کا ریکارڈ ہاؤس جی او پی کے حوالے کیا۔ ریپبلکنز صدر کے مواخذے کے لیے ووٹ کے امکان کے بارے میں فکر مند ہیں کیونکہ تحقیقات جو بائیڈن کو ان کے بیٹے کے کاروباری معاملات سے جوڑنے والے کسی بھی حتمی ثبوت کو بے نقاب کرنے میں ناکام رہی ہیں۔