ماسکو میں حملہ، داعش نے مبینہ حملہ آوروں کی تصویر جاری کر دی

داعش نے ایک تصویر جاری کرتے ہوئے کہا ہے کہ اس میں وہ حملہ آور ہیں جنہوں نے روس کے دارالحکومت ماسکو کے نزدیک ایک کنسرٹ ہال میں فائرنگ سے 133 افراد کو ہلاک کر دیا تھا۔

خبر رساں ایجنسی روئٹرز کے مطابق سنیچر کو عسکریت پسند گروپ داعش کے ٹیلیگرام چینل عماق نیوز پر تصویر پوسٹ کی گئی۔

تصویر کے ساتھ سکیورٹی ذرائع کے حوالے سے جاری بیان میں کہا گیا ہے کہ ’یہ حملہ داعش اور ان ملکوں کے درمیان لڑائی کے تناظر میں کیا گیا جو اسلام کے خلاف ہیں۔‘

داعش نے ماسکو میں حملے کی ذمہ داری قبول کی ہے تاہم روس نے اشارہ دیا ہے کہ وہ اس کے پیچھے یوکرین سے منسلک جنگجوؤں کو دیکھ رہا ہے۔

یوکرین کے حکام نے اس حملے سے کسی بھی تعلق کے الزام کی سختی سے تردید کی ہے۔

روس میں حکام نے سنیچر کو کہا ہے کہ اس حملے کے بعد گیارہ مشتبہ افراد کو حراست میں لیا گیا جن میں سے چار حملہ آور ہیں۔

روسی سرکاری خبر رساں ایجنسیوں نے ایک بیان میں کریملن کا حوالہ دیتے ہوئے کہا کہ ایف ایس بی سکیورٹی سروس کے سربراہ نے روسی صدر ولادیمیر پوتن کو ’11 افراد کی گرفتاری کے بارے میں مطلع کیا، جن میں چار دہشت گرد براہ راست حملے میں ملوث تھے۔‘