جدہ۔2مارچ (اے پی پی):سعودی عرب کی کھجور برآمدات میں گزشتہ برس 14 فیصد اضافہ ریکارڈ کیا گیا ۔سعودی خبر رساں ایجنسی کے مطابق قومی سینٹر برائے کھجور کے سی ای او محمد النویران نے برآمدات میں اضافہ کے متعلق میڈیا کو بتایا کہ یہ اضافہ کھجور کے تاجروں اور حکومتی اداروں کے درمیان تعاون سے ممکن ہوا۔انہوں نے کہا کہ حکومتی اداروں کی جانب سے مقامی وبین الاقوامی فیسٹیولز کے انعقاد کے ذریعے سعودی کھجور کو فروغ دینے اور برآمدات کو آسان بنانے کے اقدامات نے اضافہ میں اہم کردار ادا کیا۔النویران نے مزید کہا کہ بین الاقوامی سطح پر سعودی کھجور کی ایکسپورٹ کے لیے مزید کوششیں کی جارہی ہیں جن کے باعث چین، سنگاپور اور جنوبی کوریا سمیت مختلف ممالک کو کھجور کی برآمدات میں ریکارڈ اضافہ ہوا ہے۔انہوں نے کہا کہ 2023 تک سعودی عرب کی کھجوریں دنیا کے 119 ممالک میں پہنچائی جاتی تھیں جبکہ سعودی کھجور کی برآمدات میں 2016 کے مقابلے میں 152.5 فیصد اضافہ ہوا ہے۔ 8 سال قبل سعودی عرب کی کھجور کی برآمدات 579 ملین ریال تھی جو کہ سالانہ کم از کم 12.3 فیصد اضافے کے ساتھ گزشتہ سال 1.4 ارب ریال تک پہنچ گئی۔قومی سینٹر برائے کھجورکی جانب سے سعودی عرب کی کھجور کو عالمی خریداروں کے اولین ترجیح بنانے کے لیے نجی سیکٹر کے تعاون سے مختلف انیشیٹوز پر کام کررہا ہے جس میں زرعی اور صنعتی پریکٹسز میں بہتری کے ذریعے کھجور کے معیار کو بہتر بنانا اور مارکیٹنگ میں سہولیات پیدا کرنا شامل ہے۔