غزہ: فلسطین کے وزیر اعظم محمد شتیہ نے مستعفی ہونے کا اعلان کر دیا، انہوں نے اپنا استعفی صدر محمود عباس کو بھجوا دیا۔
غیر ملکی خبر رساں ایجنسی کے مطابق فلسطینی اتھارٹی کو امریکہ کی طرف سے مغربی کنارے میں اصلاحات اور بہتری لانے کے لیے شدید دباؤ کا سامنا ہے اور وزیر اعظم محمد شتیہ کا استعفیٰ فلسطینی اتھارٹی کو ہٹانے کے لیے صدر محمود عباس پر بڑھتے ہوئے امریکی دباؤ کے تناظر میں سامنے آیا۔
فلسطینی اتھارٹی کے مستعفی ہونے والے وزیر اعظم محمد شتیہ نے کہا ہے کہ سیاسی انتظامات میں فلسطینیوں کے درمیان وسیع اتفاق رائے پیدا کرنے کے لیے میں نے استعفیٰ دینے کا فیصلہ کیا۔
دوسری جانب وائٹ ہاؤس کے قومی سلامتی کے مشیر جیک سلیوان کا کہنا ہے کہ اسرائیل، مصر، قطر اور امریکہ نے عارضی جنگ بندی کا اعلان کرنے کے لیے قیدیوں کے معاہدے کے بنیادی نکات پر سمجھوتہ کر لیا ہے۔
جیک سلیوان نے کہا کہ بات چیت آخری مراحل میں ہے جبکہ قطر اور مصر کے درمیان حماس کے ساتھ بالواسطہ بات چیت ہونی چاہیے۔
انہوں نے کہا کہ جوبائیڈن نے ابھی تک رفاہ آپریشن کے حوالے سے اسرائیل کا منصوبہ نہیں دیکھا ہے۔
اس سے قبل یرغمالیوں کی رہائی سے متعلق مذاکرات کے حوالے سے اسرائیلی میڈیا کا کہنا ہے کہ پیرس میں ہونے والی بات چیت میں 40 یرغمالیوں کی رہائی کے بدلے غزہ جنگ میں 6 ہفتوں کے وقفے اور سینکڑوں فلسطینی قیدیوں کی رہائی کا معاہدہ ہونے کا امکان ہے۔امریکہ ماہ رمضان سے پہلے غزہ سے متعلق معاہدہ کروانا چاہتا ہے۔