اردن ایئرلائن کی پہلی پرواز سعودی عرب کے تاریخی وسیاحتی شہر العلا پہنچ گئی

العلا۔18فروری (اے پی پی):سعودی عرب کے تاریخی وسیاحتی شہر العلا کے بین الاقوامی فضائی اڈے پر رائل اردن ائیرلائنز کی پہلی پرواز پہنچ گئی۔

سعودی خبر رساں ادارے ’ایس پی اے‘ کے مطابق اردنی فضائی کمپنی نے 16 فروری سے العلا کے لیے اپنے فلائٹ آپریشن کا آغاز کر دیا ہے جس میں عمان کے ملکہ عالیہ بین الاقوامی ہوائی اڈے سے العلا کے لیے 2 براہ راست پروازیں چلائی جائیں گی۔العلا اور اردن کے درمیان شروع ہونے والا روٹ اردن کے شہر البترا اور العلا کے تاریخی تعلق کے پیش نظر سیاحوں اور تاریخ دانوں کے لیے اہمیت کا حامل ہے جو ان مقامات کی مشترکہ تہذیب پر تحقیق کرنے میں دلچسپی رکھتے ہیں۔

علاوہ ازیں اردن ائیر لائنز کی جانب سے العلا کے لیے فلائٹ آپریشن کا آغاز شہر کی ثقافتی کشش اور وہاں منعقد ہونے والی مختلف سیاحتی سرگرمیوں کی مقبولیت کی نشاندہی کرتا ہے۔