سعودی وزیر خارجہ میونخ سکیورٹی کانفرنس میں شرکت کے لئے جرمنی پہنچ گئے

ریاض۔16فروری (اے پی پی):سعودی عرب کے وزیر خارجہ شہزادہ فیصل بن فرحان میونخ سکیورٹی کانفرنس میں شرکت کے لئے جرمنی پہنچ گئے۔ اردو نیوز کے مطابق سعودی عرب کی وزارت خارجہ نے بیان میں کہا ہے کہ وزیر خارجہ میونخ سکیورٹی کانفرنس میں مملکت کے وفد کی سربراہی کریں گے۔

یہ کانفرنس 16 تا 18 فروری منعقد ہو گی۔ بیان میں بتایا گیا کہ شہزادہ فیصل بن فرحان کی جانب سے سب سے نمایاں بین الاقوامی امور اور امن و سلامتی کو مستحکم کرنے کے لیے کثیرالجہتی عمل کو بڑھانے کے طریقوں پر بات چیت متوقع ہے۔ سعودی وفد دیگر ممالک کے وفود کے سربراہان اور کانفرنس میں شرکت کرنے والی اہم شخصیات سے ملاقاتیں بھی کرے گا۔