استحکام پاکستان پارٹی کے چیئرمین جہانگیر ترین نے دو حلقوں سے شکست کے بعد پارٹی سربراہی سے استعفیٰ دیتے ہوئے سیاست چھوڑنے کا اعلان کر دیا ہے۔
سوشل میڈیا پلیٹ فارم ایکس پر اپنے ایک ٹویٹ میں ان کا کہنا تھا کہ ’میں ان تمام لوگوں کا شکریہ ادا کرنا چاہتا ہوں جنہوں نے اس الیکشن میں میری حمایت کی اور اپنے مخالفین کو مبارکباد پیش کرنا چاہتا ہوں۔‘
’میں پاکستانی عوام کی مرضی کا بے پناہ احترام کرتا ہوں۔ اس لیے میں نے آئی پی پی کے چیئرمین کے عہدے سے استعفیٰ دینے اور سیاست سے یکسر کنارہ کشی اختیار کرنے کا فیصلہ کیا ہے۔‘
انھوں نے کہا کہ ’میں آئی پی پی کے تمام ممبران کا شکریہ ادا کرتا ہوں۔ میں ان کے لیے نیک خواہشات کا اظہار کرتا ہوں۔ اللہ کے فضل و کرم سے میں ذاتی حیثیت میں اپنی صلاحیت کے مطابق اپنے ملک کی خدمت کرتا رہوں گا۔‘
استحکام پاکستان پارٹی کے سربراہ جہانگیر ترین کو قومی اسمبلی کی دونوں نشستوں پر شکست کا سامنا کرنا پڑا تھا۔ این اے 155 لودھراں کے نتائج کے مطابق مسلم ن لیگ کے صدیق خان بلوچ 117671 ووٹ لے جہانگیر ترین کو شکست دی تھی۔ جہانگیر ترین نے 71128 ووٹ لیے تھے۔
اسی طرح این اے 149 سے تحریک انصاف کے حمایت یافتہ آزاد امیدوار ملک عامر ڈوگر 143613 ووٹ لے کر کامیاب قرار پائے تھے اور انھوں نے جہانگیر خان ترین کو شکست دی تھی جو صرف 50166 ووٹ ہی لے سکے تھے۔