اکثر لوگوں کو اپنے بالوں سے بہت پیار ہوتا ہے اور اپنے بالوں کی حفاظت اور اسٹائل کیلئے لوگ بہت پیسہ بھی خرچ کرتے ہیں اور جب بات کٹنگ کی آئے تو کچھ لوگ ہمیشہ بااعتماد حجام کے پاس جانا پسند کرتے ہیں تاہم کبھی کبھار من پسند حجام کی عدم دستیابی پر دوسرے حجام کے پاس جانا مہنگا بھی پڑجاتا ہے کیونکہ حجام خراب کٹنگ کی وجہ سے بال خراب کردیتا ہے لیکن ہر صارف خاموشی سے جانے کی بجائے کچھ ایسے بھی ہوتے ہیں جو حجام کی بھی حجامت کردیتے ہیںجیسا کہ تھائی لینڈ میں ہوا۔
میڈیا رپورٹس کے مطابق تھائی لینڈ کے شہر پٹایا کے دورے پر آئے روسی شہری نے مقامی حجام کی ایک دکان پر بال کٹوانے کا فیصلہ کیا،سیاح سیلون میں آیا اور حجام کو ہاتھوں کے اشاروں سے بتایا کہ وہ کس طرح کے بال بنوانا چاہتا ہے کیونکہ روسی سیاح کی انگریزی بہت کمزور تھی اور حجام روسی زبان نہیں جانتا تھا۔
بال کٹوانے کے دوران جب روسی سیاح نے آئینے میں خود کو دیکھا تو اس کے غصے کی انتہا نہ رہی۔ اس نے میز پر مکے مارنا شروع کر دیے اور حجام کیلئے نازیبا الفاظ استعمال کرنے لگ گیا۔
سیاح نے غصے میں میز سے شیونگ مشین اٹھائی اور حجام کے اگلے بالوں کا کچھ حصہ مونڈ دیا۔حجام کے زبردستی بال کاٹنے کے بعد سیاح اپنے بال کٹائی کی ادائیگی کے بغیر ہی جلدی سے حجام کی دکان سے باہر نکل گیا۔
اس واقعہ کے بعد عینی شاہدین نے بتایا کہ روسی سیاح غصے میں پیسے دیئے بغیر دکان سے چلا گیا لیکن جانے سے پہلے اس نے حجام کی حجامت بنادی، اس واقعہ کو عالمی میڈیا نے نمایاں کوریج دی اور سوشل میڈیا پر بھی یہ خبر وائرل ہوچکی ہے۔