نگران وزیراعلیٰ خیبر پختونخواجسٹس (ر) سید ارشد حسین شاہ کی ڈیرہ اسماعیل خان اور ٹانک میں پولیس پر حملوں کی مذمت

پشاور۔ 08 فروری (اے پی پی):نگران وزیراعلیٰ خیبر پختونخواجسٹس (ر) سید ارشد حسین شاہ نے ڈیرہ اسماعیل خان اور ٹانک میں پولیس پر حملوں کی شدید الفاظ میں مذمت کی ہے اورپولیس اہلکاروں کی شہادت پر افسوس کا اظہار کیا ہے ۔

یہاں سے جاری اپنے ایک بیان میں وزیراعلیٰ نے شہداءکے لواحقین سے دلی ہمدردی اور تعزیت کا اظہار کرتے ہوئے شہداءکے درجات کی بلندی اور پسماندگان کیلئے صبر جمیل کی دُعا کی اور کہا کہ اس طرح کے بزدلانہ واقعات سے پولیس کے حوصلے پست نہیں ہوں گے ، خیبرپختونخوا پولیس نے امن کی خاطر لازوال قربانیاں دی ہیں۔

حکومت اور عوام پولیس اور دیگر سکیورٹی اداروں کے شانہ بشانہ کھڑے ہیں، شہداءکے لواحقین کو تنہا نہیں چھوڑا جائے گا۔ وزیراعلیٰ نے ان حملوں میں زخمی پولیس اہلکاروں کی جلد صحت یابی کیلئے بھی نیک خواہشات کا اظہار کیا ہے ۔