مچھ حملہ: سکیورٹی فروسز کی جوابی کارروائی میں 9 دہشت گرد ہلاک

پیر اور منگل کی درمیانی شب صوبہ بلوچستان کے علاقوں مچھ اور کولپور کے کمپلیکسز میں خودکش حملہ آوروں اور دہشت گردوں نے دھاوا بولا جسے قانون نافذ کرنے والے اداروں نے بروقت اور موثر ردعمل ظاہر کرتے ہوئے ناکام بنا دیا۔

افواج پاکستان کے شعبہ تعلقات عامہ آئی ایس پی آر کے مطابق ’سکیورٹی فورسز ان کارروائیوں کے بعد فوری طور پر حرکت میں آگئیں جنہوں نے دہشت گردوں کے خلاف آپریشن کیا۔‘آئی ایس پی آر کا مزید کہنا ہے کہ ’اس کارروائی میں تین خودکش حملہ آوروں سمیت نو دہشت گرد مارے جا چکے ہیں جب کہ تین زخمی ہوئے ہیں۔‘’تاہم، شدید فائرنگ کے تبادلے میں بہادری سے دہشت گردوں کا مقابلہ کرتے ہوئے سکیورٹی فورسز کے چار ارکان کے علاوہ دو بے گناہ شہری بھی جان سے گئے۔‘آئی ایس پی آر کے بیان میں کہا گیا ہے کہ ’قانون نافذ کرنے والے اداروں کے موثر ردِعمل سے یہ ظاہر ہو گیا ہے کہ وہ دہشت گردوں کا مقابلہ کرنے کے لیے یکسو ہیں۔‘’پاکستان کی سکیورٹی فورسز ملک میں امن و استحکام قائم کرنے کے لیے قانون نافذ کرنے والے دیگر اداروں کے ساتھ شانہ بشانہ کام کر رہی ہیں۔‘