اسلام آباد۔28جنوری (اے پی پی):چیئرمین فیڈرل بورڈ آف ریونیو ملک امجد زبیر ٹوانہ نے ٹیکس چوری پر معیاری مالیاتی انٹیلی جنس کی ترقی اور تحقیقات میں اس کے بہترین استعمال کے لیے فیڈرل بورڈ آف ریونیو (ایف بی آر) اور فنانشل مانیٹرنگ یونٹ (ایف ایم یو) کے درمیان مستقل تعاون کی ضرورت پر زور دیا ہے۔اتوار کو ایف بی آر کی جانب سے جاری بیان کے مطابق چیئرمین نے یہ بات ایف بی آر ہیڈ کوارٹرز میں ایف سی ڈی او زکے اپ سکیل پروگرام کے تعاون سے منعقد ہونے والی مالیاتی انٹیلی جنس برائے ٹیکس چوری پر ایف بی آر،ایف ایم یو کی مشترکہ دو روزہ ورکشاپ کی اختتامی تقریب سے خطاب کرتے ہوئے کہی۔چیئرمین ایف بی آر نے ڈائریکٹوریٹ جنرل آف انٹیلی جنس اینڈ انویسٹی گیشن،ان لینڈ ریونیو اور ایف ایم یو کو تقریب کے انعقاد پر مبارکباد پیش کی اور غیر قانونی مالیات سے نمٹنے کے متفقہ ہدف کو حاصل کرنے کے لیے اس شراکت داری کو مزید بڑھانے کی خواہش کی۔ ملک امجد زبیر ٹوانہ نے اس موقع پر موجود برٹش ہائی کمیشن لیوس ایونز کا بھی شکریہ ادا کیا جنہوں نے تقریب کے انعقاد میں تعاون فراہم کیا۔ایف ایم یو کی ڈائریکٹر جنرل لبنیٰ فاروق نے ایف بی آر اور ایف سی ڈی او کا شکریہ ادا کیا اور ٹیکس فراڈ اور ٹیکس چوری سے نمٹنے کے لیے معلومات کی بنیاد کو بڑھانے اور باہمی افہام و تفہیم کو فروغ دینے کے لیے ایف بی آر اور ایف ایم یو کے درمیان پائیدار ہم آہنگی کی ضرورت پر زور دیا۔انہوں نے کہا کہ باہمی تعاون پر مبنی یہ نقطہ نظر تحقیقات کی تاثیر میں اضافہ کرے گا اور مالی جرائم سے نمٹنے کے لیے زیادہ مضبوط اور باہم مربوط فریم ورک میں حصہ ڈالے گا۔ورکشاپ میں ایف ایم یو کے تجزیہ کاروں اور ڈائریکٹوریٹ جنرل آف انٹیلی جنس اینڈ انویسٹی گیشن ان لینڈ ریونیو کے تفتیشی افسران نے بھی شرکت کی۔ ورکشاپ نے ٹیکس جرائم سے متعلق مالیاتی انٹیلی جنس کے لیے خطرے والے علاقوں کی نشاندہی اور ان کو سمجھنے پر توجہ مرکوز کی۔