اسلام آباد۔28جنوری (اے پی پی):پیٹرولیم شعبے کو درپیش چیلنجز، تازہ ترین رجحانات اور پالیسی اقدامات کے حوالے سے پیٹرولیم کانفرنس کل ( منگل کو) ہوگی ۔ کانفرنس میں بین الاقوامی مندوبین، حکومتی نمائندے، پالیسی ساز، ریگولیٹرز، توانائی اور پیٹرولیم (ای اینڈ پی) شعبے کے سرمایہ کار شرکت کریں گے۔مختلف چیلنجز کے باعث پاکستان میں پیٹرولیم شعبے کو سرمایہ کاری میں کمی کا سامنا ہے، جس کی وجہ سے مقامی پیداوار میں کمی اور توانائی کے درآمدی بل میں اضافہ ہورہا ہے۔ اتوار کو جاری ایک پریس ریلیز کے مطابق پاکستان اپنی توانائی کی ضروریات کو پورا کرنے کے لیے درآمدات پر بہت زیادہ انحصار کرتا ہے۔پیٹرولیم کانفرنس 2024 پروفیشنلز، ریسرچرز اور فیصلہ سازوں کے درمیان نیٹ ورکنگ اور روابط کو فروغ دینے کے مواقع فراہم کرے گی۔ شرکاء کو صنعت کے ماہرین سے رابطہ استوار کرنے، ممکنہ شراکتیں بنانے اور صنعت کی تازہ ترین پیشرفت سے باخبر رہنے کا موقع ملے گا۔کانفرنس میں پاکستان کی پیٹرولیم ایکسپلوریشن اور پروڈکشن کمپنیوں کے لیے دو ورکشاپس کا بھی اہتمام کیا گیا ہے۔ورکشاپس کے ذریعے تمام شراکت داروں کو بامعنی بات چیت کے لیے ایک اہم اور براہ راست پلیٹ فارم فراہم کیا گیا ہے جس کا مقصد مسائل کو حل کرنا اور صنعت میں سرمایہ کاری کو بڑھانا ہے۔ کانفرنس کے دوران تمام شراکت داروں کے درمیان تعاون کو فروغ دینے، اہم مسائل کو حل کرنے اور ہم آہنگی پیدا کرنے کے لیے سفارشات بھی پیش کی جائیں گی۔ پیٹرولیم کانفرنس 2024 اُن پروفیشنلز کے لیے اہم تقریب ثابت ہوگی جو روابط قائم کرنے اور پیٹرولیم شعبے کی ترقی میں اپنا کردار ادا کرنے کے خواہاں ہیں۔