بلوچستان کے ضلع کیچ سے نامعلوم افراد نے پنجاب سے تعلق رکھنے والے پانچ مزدوروں کو اغوا کرلیا۔لیویز حکام کے مطابق پانچوں افراد ضلع کیچ کی سب تحصیل ہوشاب میں نجی موبائل کمپنی کے موبائل ٹاور کی تنصیب کرنے کے بعد ایک اور ٹاور نصب کرنے آواران جا رہے تھے۔
ہوشاب لیویز تھانے کے انچارج منظور احمد نے اردو نیوز کو ٹیلیفون پر بتایا کہ پانچوں افراد 24 گھنٹے گزرنے کے باوجود آواران نہیں پہنچ سکے۔
اطلاع ہے کہ انہیں آواران سے ملحقہ ضلع کیچ کے علاقے ہوشاب میں ڈنڈار ڈھلے بازار کے قریب سے نامعلوم افراد نے اغوا کرلیا ہے۔انہوں نے بتایا کہ مغویوں کی شناخت نذیر احمد، فاروق احمد، محمد طارق، صفدر اور حسنین کے ناموں سے ہوئی ہے جو جنوبی پنجاب کے رہائشی بتائے جاتے ہیں۔لیویز انچارج کے مطابق آواران اور کیچ کو ملانے والا یہ راستہ اور علاقہ سکیورٹی کے لحاظ سے حساس ہے اور یہاں کالعدم تنظیمیں سرگرم ہیں خدشہ ہے کہ انہیں بلوچ مسلح کالعدم تنظیم نے اغوا نہ کرلیا ہو۔پانچوں افراد سکیورٹی کے بغیر آواران کی طرف روانہ ہوئے تھے۔انہوں نے بتایا کہ مزدوروں کی تلاش کا کام شروع کردیا گیا ہے۔