اسلام آباد۔19جنوری (اے پی پی):الیکشن کمیشن آف پاکستان نے عام انتخابا ت کے دوران فول پروف سکیورٹی یقینی بنانے کیلئے انتخابی ڈیوٹی اور انتظامات کے لئے تعینات سکیورٹی اہلکاروں کے لئے ضابطہ اخلاق جاری کر دیا۔ جمعہ کو الیکشن کمیشن سے جاری کئے گئے ضابطہ اخلاق کے مطابق عام انتخابات 2024 کے لئے ماسوائے مسلح افواج ، قانون نافذ کرنے والے اداروں سے تعلق رکھنے والے سکیورٹی اہلکاروں اور سول آرمڈ فورسز (جن کے لئے علیحدہ ضابطہ اخلاق جاری کیا جا رہا ہے) کو تعینات کیا گیا ہے وہ عام انتخابات میں قانون کے مطابق اور مینڈیٹ کی حدود میں رہتے ہوئے اپنے فرائض سرانجام دیں گے۔عا م انتخابات 2024 کو آزادانہ، منصفانہ، شفاف اور پرامن انداز میں منعقد کرنے کیلئے تمام پولنگ سٹیشنوں کے باہر سکیورٹی اہلکار تعینات کئے جائیں گے، ان کی ذمہ داریوں میں امن و امان یقینی بنانے کیلئے محفوظ ماحول کی فراہمی، بیلٹ پیپرز کی چھپائی کے دوران پرنٹنگ پریس کی سکیورٹی، پرنٹنگ پریس سے بیلٹ پیپرز کی نقل و حمل کے دوران سکیورٹی، ریٹرننگ افسران کے دفتر کی سکیورٹی، پولنگ بیگز کی نقل و حمل کے دوران پریذائیڈنگ افسران کو سکیورٹی، ریٹرننگ افسران کے دفاتر سے پولنگ سٹیشنوں تک سکیورٹی، آر او آفسز میں انتخابی مواد کی نقل و حمل کے دوران سکیورٹی، پولنگ سٹیشنوں پر پولنگ اور گنتی مکمل ہونے کے بعد سکیورٹی اور ریٹرننگ افسران کے دفاتر میں ریکارڈ کی وصولی کی سکیورٹی شامل ہیں۔یہ اہلکار پاکستان کے آئین کے آرٹیکل 220، سیکشن 5 کے تحت اپنے فرائض سرانجام دیں گے۔قانون نافذ کرنے والے ادارے کا ہر گزیٹڈ افسر الیکشن کمیشن کی جانب سے جاری کئے جانے والے نوٹیفکیشن کے ذریعے ان کو تفویض کئے گئے اختیارات استعمال کرے گا۔پاکستان الیکشنز ایکٹ 2017 کے سیکشن 193 کے مطابق متعلقہ ڈسٹرکٹ ریٹرننگ افسران، ریٹرننگ افسران کے ساتھ تعاون کریں گے، الیکشنز ایکٹ 2017 کے سیکشن 83(4) کے تحت پریذائیڈنگ آفیسر کو اس کے قانونی فرائض کی ہموار اور موثر انجام دہی میں معاونت کرنا ہے جبکہ پولنگ میں نظم و نسق برقرار رکھنا پریذائیڈنگ آفیسر کی بنیادی ذمہ داری ہے،انتخابی عمل کے دوران عام طور پر اور اس کے دوران غیر جانبدار رہیں گے خاص طور پر ووٹنگ کا عمل اور کسی سیاسی جماعت کے حق میں یا خلاف کام نہیں کریں گے ، ان اہلکاروں میں پولیس، فرنٹیئر کانسٹیبلری، پنجاب کانسٹیبلری، بلوچستان کانسٹیبلری اور لیویز کے اہلکار شامل ہیں جو الیکشن ڈیوٹی-2024 کے دوران سکیورٹی کی فراہمی اور امن و امان کی صورتحال کو برقرار رکھیں گے،پریذائیڈنگ آفیسر نظم کو برقرار رکھنے اور بلا تعطل ووٹنگ کو یقینی بنانے کے لئے پارٹی یا امیدوار ہر طرح سے ان کے ساتھ مکمل تعاون کریں گے،شائستگی ، ووٹرز اور پولنگ سے نمٹنے میں مثالی رویے کا مظاہرہ کریں گے، پولنگ سٹیشن کے باہر اور اندر کسی الجھن یا ناخوشگوار صورتحال کی صورت میں عملہ صرف قانون کے مطابق کام کرتے ہوئے کسی بھی صورتحال سے نمٹنے کے لئے ان کی رہنمائی میں مدد کریں گے، اس بات کو یقینی بنائیں گے کہ ووٹرز کو پولنگ سٹیشنوں کے باہر پرامن، خوشگوار، محفوظ اور سازگار ماحول فراہم کیا جائے گا، ووٹرز کو کسی بھی طرح سے نہ ڈرایا جائے گا اور نہ ہی ووٹ ڈالنے سے روکا جائے گا، اس بات کو یقینی بنانے کے لئے پولنگ سٹیشن کے احاطے میں داخل ہونے سے پہلے ہر ووٹر کو چیک کریں گے، کوئی بھی شخص اپنے ساتھ کوئی ہتھیار / دھماکہ خیز یا ناپسندیدہ چیز نہیں لا سکتا ان میں موبائل فون سمیت ایسی اشیاء جو پولنگ کے عمل کو سبوتاژ کر سکتی ہیں شامل ہیں، ووٹرز کو سہولت فراہم کریں گے اور یقینی بنائیں گے کہ وہ مناسب طریقے سے قطار میں ہیں، اس سہولت کے بزرگ، خواجہ سرا، حاملہ خواتین، شیر خوار خواتین اور معذور ووٹر حقدار ہیں، پولنگ کے پرامن اور شفاف عمل کو یقینی بنانے پر خصوصی توجہ دیں گے، پولنگ سٹیشن کے باہر ڈیوٹی سرانجام دیں گے اور پریذائیڈنگ افسر کی ہدایات پر عمل کریں گے،قانون کے مطابق امیدوار کو ہر پولنگ بوتھ پر موجود رہنے کی اجازت ہے تاہم ہر امیدوار کے صرف ایک پولنگ ایجنٹ کو پریذائیڈنگ آفیسر گنتی کے عمل اور نتائج کی تیاری کا مشاہدہ کرنے کی اجازت دے گا،قانون کے مطابق پریذائیڈنگ آفیسر سے فارم-45 (گنتی کا نتیجہ) اور فارم 46 (بیلٹ پیپر اکاؤنٹ) کی کاپی لینے کی اجازت ہے۔ اسی طرح مبصر، اگر کوئی ہے جو گنتی کے وقت موجود ہو تو اس کو بھی فارم کی مذکورہ کاپیاں مل سکتی ہیں، ریٹرننگ آفیسر کے دفتر کے احاطے کو شام تک سکیورٹی فراہم کی جائے گی، نتائج کی تکمیل اور پولنگ بیگز کے محفوظ ڈیپازٹ کو یقینی بنایا جائے گا، پریذائیڈنگ افسران تمام انتخابی قوانین سے متعلقہ قوانین کی پابندی اور عوام کا اعتماد حاصل کرنے کی کوشش کریں گے، ڈسٹرکٹ ریٹرننگ آفیسرز/ریٹرننگ آفیسرز کسی بھی وقت پولنگ سٹیشنوں کا دورہ کریں ، تسلیم شدہ مبصرین اور میڈیا والوں کو پولنگ سٹیشن میں داخل ہونے کی اجازت دیں، میڈیا کو کیمرے کے ساتھ ووٹنگ کی گنتی کے عمل کی فوٹیج بنانے کی اجازت دی جائے گی سوائے سکرین آف کمپارٹمنٹ کے تاکہ رازداری کو برقرار رکھا جا سکے۔ مزید برآں پولنگ عملے کے علاوہ کسی دوسرے شخص کو اندر آنے کی اجازت نہ دیں،الیکشن میں حصہ لینے والے کسی بھی امیدوار کے ساتھ جھگڑے میں نہ پڑیں، ایجنٹ، پولنگ ایجنٹ، مبصر یا میڈیا پرسن کو کسی بھی طریقے سے پریذائیڈنگ آفیسر ، اسسٹنٹ پریذائیڈنگ آفیسر یا پولنگ آفیسر کے کام میں کسی بھی طرح سے مداخلت نہ کرنا اور پولنگ سٹیشن کے باہر ظاہری بے ضابطگی پر اپنی طرف سے جواب نہیں دینا ہے، وہ اس معاملے کو پریذائیڈنگ آفیسر کے علم میں لائیں گے اور ضروری کارروائی کریں گے، امیدوار، اس کے الیکشن ایجنٹ یا مبصر اگر کوئی ہو، گنتی کے عمل کے دوران اس کی پولنگ کی موجودگی پر اعتراض نہ کریں، پولنگ سٹیشن پر کسی بھی شخص کو گرفتار نہ کرنا جب تک ایسا کرنے کے لئے پریذائیڈنگ آفیسر کی طرف سے واضح طور پر ہدایت نہ کی جائے، گنتی کے عمل میں کسی بھی طرح سے مداخلت نہیں کی جائے گی بلکہ جاری رہے گی، گنتی مکمل کرنے کے لئے پولنگ سٹیشن کے باہر پرامن ماحول فراہم کیا جائے۔