تعلیم کی فراہمی میں ٹیکنالوجی سے استفادہ ضروری ہے، ہماری اولین ترجیح سکولوں سے باہر بچوں کا تعلیمی اداروں میں داخلہ ہے، مدد علی سندھی

اسلام آباد۔15جنوری (اے پی پی):وفاقی وزیر تعلیم و پیشہ وارانہ تربیت مدد علی سندھی نے کہا ہے کہ تعلیم کی فراہمی میں ٹیکنالوجی سے استفادہ ضروری ہے، ہماری اولین ترجیح سکولوں سے باہر بچوں کا تعلیمی اداروں میں داخلہ ہے، اس کیلئے بھی ٹیکنالوجی سے مدد لی جائے گی۔

ان خیالات کا اظہار انہوں نے پیر کو یونیسکو، ای ڈی ٹیک حب اور آئی ٹی اے کے تعاون سے گلوبل ایجوکیشن مانیٹرنگ رپورٹ 2023 کے قومی اجراء کے موقع پر منعقدہ تقریب کی صدارت کرتے ہوئے کیا۔ وفاقی وزیر تعلیم نے کہا کہ اس سال جی ای ایم رپورٹ کا موضوع انتہائی مناسب ہے۔ انہوں نے کہا کہ تعلیم کی فراہمی میں ٹیکنالوجی کے کردار کا جائزہ لینا بہت ضروری ہے،پاکستان نے حال ہی میں تعلیم کی فراہمی میں ٹیکنالوجی کے استعمال کو بہت اہمیت دی ہے۔

مدد علی سندھی نے کہا کہ ان کی اولین ترجیح سکول سے باہر بچوں کی شرح کو کم کرنا ہے،اس تعداد کو کم کرنے میں ٹیکنالوجی کا کردار بھی اہم ہے،اب وقت آگیا ہے کہ پاکستان دنیا کے ترقی یافتہ ممالک کی رفتار سے ہم آہنگ ہو۔ انہوں نے کہا کہ تعلیم کا معیار ایک اور چیلنج ہے جسے ان کی سربراہی میں سب سے زیادہ ترجیح دی گئی ہے۔ وفاقی وزیر نے کہا کہ انہوں نے اس بات کو یقینی بنانے پر خصوصی زور دیا ہے کہ طلباء کو محفوظ اور سازگار ماحول فراہم کرنے کے لئے وفاق کے سکولوں میں بنیادی ضروریات دستیاب ہوں۔

مدد علی سندھی نے وزارت تعلیم کے ذریعے کوویڈ میں میں ٹیلی سکول اور تعلیمی ریڈیو چینلز کی ترقی اور آغاز پر اظہار خیال کرتے ہوئے کہا کہ ٹیکنالوجی پسماندہ علاقوں کے طلباء کو پیچھے چھوڑ سکتی ہے۔ انہوں نے کہا کہ وزارت تعلیم اس بات کو یقینی بنائے گی کہ ٹیکنالوجی کے استعمال کو اس طرح اپنا لیا جائے کہ کوئی بچہ پیچھے نہ رہے