برطانوی ہائی کمشنر کا پاکستان کے زیرِانتظام کشمیر کا دورہ، انڈیا کا احتجاج

انڈیا نے برطانوی سفارت کار کی جانب سے پاکستان کے زیرِ انتظام کشمیر کے دورے کو ’خودمختاری اور علاقائی سالمیت‘ کی خلاف ورزی قرار دیتے ہوئے احتجاج ریکارڈ کروایا ہے۔

خبر رساں ادارے روئٹرز کے مطابق انڈیا نے سنیچر کو جاری بیان میں کہا کہ ’پاکستان میں تعینات برطانوی ہائی کمشنر جین میریٹ نے برطانوی وزارت خارجہ کے ایک عہدیدار کے ہمراہ 10 جنوری کو پاکستانی کشمیر کا دورہ کیا۔‘

بیان میں کہا گہا ہے کہ انڈیا کے سیکریٹری خارجہ وینے کواترا نے دہلی میں موجود برطانوی ہائی کمشنر کو ’شدید احتجاج‘ ریکارڈ کروایا ہے اور اس دورے کو ’ناقابل قبول‘ قرار دیا ہے۔

برطانوی وزارت خارجہ نے جین میریٹ کے دورے کی تصدیق کرتے ہوئے کہا کہ ’وہ پاکستانی نژاد برطانوی شہریوں سے ملیں، بچوں کے ساتھ گلی میں فٹبال میچ کھیلا اور ایک بیکری کا بھی دورہ کیا۔‘

تاہم برطانوی وزارت خارجہ نے انڈیا کے احتجاج کے حوالے سے تبصرہ کرنے سے گریز کیا۔

خیال رہے کہ برطانوی ہائی کمشنر کا دورہ ایسے موقع پر ہوا جب انڈیا اور پاکستان دونوں حریف ممالک میں عام انتخابات ہونے جا رہے ہیں۔