تائیوان کے حوالے سے پاکستان کی پالیسی مستقل، واضح اور اصولی ہے ،پاکستان ون چائنا پالیسی پر عمل پیرا ہے ، ترجمان دفتر خارجہ

اسلام آباد۔13جنوری (اے پی پی):ترجمان دفتر خارجہ نے کہا ہے کہ تائیوان کے حوالے سے پاکستان کی پالیسی مستقل، واضح اور اصولی ہے، پاکستان ون چائنا پالیسی پر عمل پیرا ہے ۔

تائیوان میں انتخابات کے حوالے سے میڈیا کے سوالات کے جواب میں وزارت خارجہ کی ترجمان ممتاز زہرہ بلوچ نے ہفتہ کو جاری ایک بیان میں کہاکہ تائیوان کے حوالے سے پاکستان کی پالیسی مستقل، واضح اور اصولی ہے۔ تائیوان عوامی جمہوریہ چین کا اٹوٹ حصہ ہے۔

ترجمان نے کہا کہ پاکستان ون چائنا پالیسی پر عمل پیرا ہے اور اقوام متحدہ کے چارٹر میں درج اصولوں اور مقاصد کے مطابق تمام ممالک کے داخلی معاملات میں مداخلت نہ کرنے کا مطالبہ کرتا ہے۔