اسلام آباد۔13جنوری (اے پی پی):پاکستان کی جانب سے فلسطینی بہن بھائیوں کی مدد کے لیےامدادی سامان کی چوتھی کھیپ پاک فضائیہ کی خصوصی پرواز کے ذریعے نور خان ائیر بیس سے روانہ کر دی گئی ، اس موقع پر نگران وزیر خارجہ جلیل عباس جیلانی نے فلسطینی عوام کی بھرپور حمایت کا اعادہ کرتے ہوئے کہا کہ غزہ کے مظلوم عوام کو انسانی امداد کی فوری فراہمی یقینی بنانے کے ساتھ ساتھ فوری جنگ بندی کی جائے۔ہفتہ کو این ڈی ایم اے کی جانب سے جاری بیان کے مطابق غزہ کے لئے پاکستان سے 20 ٹن امدادی سامان کی چوتھی کھیپ روانہ کی گئی جس میں غزہ میں زمینی ضروریات کے مطابق سرجیکل/طبی سامان، خشک کھانے کی اشیاء کے علاوہ حفظان صحت کی کٹس بھی شامل ہیں ۔خصوصی پرواز امدادی سامان لیکر اردن پہنچے گی جہاں اردن میں تعینات پاکستانی سفیر امدادی سامان وصول کریں گے ، امدادی سامان وصولی کے بعد تقسیم کے لئے غزہ روانہ کر دیا جائے گا ۔ نگران وزیر خارجہ جلیل عباس جیلانی، پاکستان میں فلسطین کے سفیر احمد ربیع، این ڈی ایم اے، وزارت خارجہ اور مسلح افواج کے سینئر افسران نے نورخان ایئر بیس پر امدادی سامان کی روانگی کی تقریب میں شرکت کی۔وزیر خارجہ نے فلسطینی عوام کی بھرپور حمایت کا اظہار کیا اور غزہ میں شہریوں بالخصوص خواتین اور بچوں کے خلاف اسرائیل کی جانب سے غیر متناسب اور اندھا دھند طاقت کے استعمال کی مذمت کی۔ وزیر خارجہ نے جنوبی افریقہ کی جانب سے فلسطینی عوام کی نسل کشی کے کیس کی انٹرنیشنل کورٹ آف جسٹس میں مکمل حمایت کا اعادہ بھی کیا۔وزیرخارجہ نے غزہ کے مظلوم عوام کو انسانی امداد کی فوری فراہمی کو یقینی بنانے کے ساتھ ساتھ فوری جنگ بندی کا مطالبہ بھی کیا ۔ وزیر خارجہ نے کہا کہ غزہ کے لئے مزید انسانی امداد کا بھی انتظام کیا جا رہا ہے جو بہت جلد پاکستانی عوام کی جانب سے بھیجی جائیگی۔اس موقع پر پاکستان میں فلسطین کے سفیر نے امدادی سامان کی فراہمی پر حکومت پاکستان کا شکریہ ادا کیا۔ واضح رہے ابھی تک غزہ کی مصیبت زدہ عوام کے لئے این ڈی ایم اے نے220 ٹن امدادی سامان بھیجا گیا ہے۔ پاکستان مشکل کی اس گھڑی میں فلسطینی بھائی بہنوں کے ساتھ کھڑا ہے اور ان کی حمایت جاری رکھے گا۔