اسلام آباد۔13جنوری (اے پی پی):نگراں وفاقی وزیر انفارمیشن ٹیکنالوجی ڈاکٹر عمر سیف نے کہا ہے کہ نگراں حکومت کے 4 ماہ میں جامعات سے فارغ 2 لاکھ آئی ٹی گریجویٹس کو عالمی معیار کی تربیت کا پروگرام شروع کیا گیا، فری لانسرز کیلئے ڈیجیٹل پیمنٹ گیٹ وے کا بڑا مسئلہ حل کیا گیا جس کے نتیجے میں یکم فروری سے پائلٹ پراجیکٹ کے تحت 10 ہزار اکاونٹ بنائے جائیں گے-وزارت انفارمیشن ٹیکنالوجی کی طرف سے جاری بیان کے مطابق ان خیالات کا اظہار انہوں نے نگراں حکومت کے دور میں وزارت انفارمیشن ٹیکنالوجی کے اقدامات کی تفصیلات بتاتے ہوئے کیا – انہوں نے کہا کہ نگراں دور حکومت کے 4 ماہ کے دوران وزارت آئی ٹی کی کارکردگی شاندار رہی، خصوصی سرمایہ کاری سہولت کونسل نے ہماری پالیسیوں اورمنصوبوں کی بروقت منظوری میں اہم کردار ادا کیا-ڈاکٹرعمر سیف نے کہا کہ آج ہم آئی ٹی کمپنیوں کو 50 فیصد ڈالرز ان کے اکاؤنٹس میں رکھنے کی سہولت دینے کے قابل ہوگئے ہیں- نگراں وفاقی وزیر نے کہا کہ جامعات سے فارغ التحصیل 2 لاکھ آئی ٹی گریجویٹس کو عالمی معیار کی تربیت کا پروگرام شروع کیا گیا ہے – انہوں نے کہا کہ فری لانسرز کیلئے ڈیجیٹل پیمنٹ گیٹ وے کا بڑا مسئلہ حل کیا گیا ہے جس کے نتیجے میں یکم فروری سے پائلٹ پراجیکٹ کے تحت 10 ہزار اکاونٹ بنائے جائیں گے- ڈاکٹر عمر سیف نے کہا کہ فری لانسرز کے یہ اکاؤنٹ پے پال کے ذریعے اپنی رقوم یہاں اکاؤنٹ میں وصول کرسکیں گے، فری لانسرز کو ایک چھت تلے سہولیات کی فراہمی کے لئے 10 ہزار ای روزگار مراکز بنارہے- انہوں نے کہا کہ ان مراکز سے 10 لاکھ فری لانسرز کام کرکے آئی ٹی برآمدات میں 10 ارب ڈالرز سالانہ اضافہ کرسکتے ہیں،ڈاکٹر عمر سیف نے کہا کہ فائیو جی اسپیکٹرم کیلئے تمام رکاوٹوں کو دور کرتے ہوئے اسپیکٹرم کی دستیابی یقینی بنائی گئی ہے، آکشن ایڈوائزری کمیٹی کے احکامات پر کنسلٹنٹ کی تقرری ہو گی اور جولائی اگست تک اسپیکٹرم کی نیلامی ہوگی- وزیر انفارمیشن ٹیکنالوجی نے کہا کہ ملک بھر میں مزید 2 لاکھ کلومیٹر آپٹیکل فائبر کیبل بچھانے کے منصوبے کا جلد آغاز کررہے ہیں، رائٹ آف وے پالیسی کا مکمل نفاذ کیا گیا ہے اور مختلف اداروں کے مابین تنازعات کا خاتمہ کردیا گیا ہے-ڈاکٹر عمر سیف نے کہا کہ ٹیلی کمیونیکیشن ٹریبونل کا قیام عمل میں لانے سے ٹیلی کام سیکٹر کا دیرینہ مطالبہ پورا کردیا گیا ہے- انہوں نے کہا کہ نوجوان تخلیق کاروں کی مدد کیلئے 2 ارب روپے سے پاکستان اسٹارٹ اپ فنڈ کا اجراء کیا گیا، موبائل فونز مینوفیکچرنگ کمپنیوں کو سہولیات دینے کیلئے ریسرچ اینڈ ڈویلپمنٹ فنڈ قائم کررہے- ڈاکٹر عمر سیف نے کہا کہ اسپیس پالیسی کی منظوری دی گئی ہے، عالمی کمپنیوں کیلیے سیٹلائٹ انٹرنیٹ کی مارکیٹ اوپن کردی گئی ہے