سی ڈی اے نے 11.141 ارب سے زائد کے پلاٹ فروخت کئے

اسلام آباد۔11جنوری (اے پی پی):کیپیٹل ڈویلپمنٹ اتھارٹی (سی ڈی اے) نے 11.141 ارب سے زائد کے پلاٹ فروخت کئے ،پلاٹس کی نیلامی 12 جنوری تک گندھارا سٹیزن سینٹر، F-9 پارک، اسلام آباد میں جاری رہے گی۔تفصیلات کے مطابق نیلامی کے دوسرے روز ڈپلومیٹک انکلیو کا اپارٹمنٹ پلاٹ 3 ارب 34 کروڑ 44 لاکھ روپے میں نیلام ہوا۔نیلام عام میں اسلام آباد کے ڈویلپ کمرشل مراکز میں مختلف کٹیگریز کے کمرشل پلاٹس سرمایہ کاری کے لئے پیش کئے جارہے ہیں۔

نیلامی کی نگرانی سی ڈی اے ممبر فنانس کی سربراہی میں قائم کی گئی نیلامی کمیٹی کررہی ہے جس کی سیکرٹری ڈائریکٹر اسٹیٹ منیجمنٹ-II ہیں۔ کمیٹی کے دیگر ارکان میں ممبر اسٹیٹ، ممبر پلاننگ اینڈ ڈیزائن، ممبر ٹیکنالوجیو ڈیجٹلائزیشن،ڈی ایف اے-II، ڈی جی لاء، ڈائر یکٹر اربن پلاننگ، ڈائریکٹر ریجنل پلاننگ، ڈائریکٹر پبلک ریلشنز اور ڈائریکٹر فنانس کر رہے ہیں۔

واضح رہے کمیٹی نے نیلام عام کو شفاف اور مقابلے کی فضا بنانے کے لئے مؤثر انتظامات کئے ہیں جس کے باعث سرمایہ کار بولی میں بڑھ چڑھ کر حصہ بھی لے رہے ہیں اور اپنی پسند کے مطابق پلاٹ حاصل کررہے ہیں۔موصول ہونے والی بولیوں کو مکمل جانچ پڑتال کے بعد سی ڈی اے بورڈ کے سامنے پیش کیا جائے گا جو بولیوں کو منظور یا مسترد کرنے کا مجاز فورم ہے۔