اسلام آباد۔9جنوری (اے پی پی):نگران وفاقی وزیر آئی ٹی و ٹیلی کمیونیکیشن ڈاکٹر عمر سیف نے پاکستان سٹارٹ اپ فنڈ کا اجراء کر دیا ہے۔ اس حوالے سے تقریب کا انعقاد یہاں منگل کو ہوا۔تقریب میں ملکی و غیر ملکی وینچر کیپیٹلسٹ، سرمایہ کار ، سفارتکاروں ، معروف ٹیکنالوجی کمپنیوں کے نمائندگان اور وزارت آئی ٹی و ٹیلی کمیونیکیشن اور ذیلی اداروں کے سینئر افسران نے شرکت کی۔پاکستان سٹارٹ اپ فنڈ کی لانچنگ تقریب سے خطاب کرتے ہوئے ڈاکٹر عمر سیف نے کہا حکومت پاکستان ہر سال ‘پاکستان سٹارٹ اپ فنڈ’ کے لیے تقریبا 2 ارب روپے مختص کرے گی، اس کے ذریعے تقریبا 10 ارب روپے کی بیرونی سرمایہ کاری متوقع ہے، اس فنڈ کا مقصد پاکستان میں وینچر سرمایہ کاری تیز تر کرنا ہے، اس فنڈ سے سٹارٹ اپس کو مالی معاونت فراہم کی جائے گی۔انہوں نے کہا ’’پاکستان سٹارٹ اپ فنڈ‘‘کے ذریعے ہر سٹارٹ اپ کو 30 فیصد مالی معاونت فراہم کی جائے گی جبکہ وینچر کیپیٹلسٹ کو 70 فیصد سرمایہ کاری کرنا پڑے گی۔ اگر ایک سٹارٹ اپ کو ایک ملین ڈالر کی سرمایہ کاری درکار ہے تو غیر ملکی سرمایہ کار 7 لاکھ ڈالر ڈالنا ہوں گے جبکہ 3 لاکھ ڈالر پاکستان سٹارٹ اپ فنڈ کی طرف سے ڈال دیئے جائیں گے۔ اس طرح بہت سے غیر ملکی سرمایہ کار پاکستان کی طرف متوجہ ہوں گے۔ڈاکٹر عمر سیف نے کہا پاکستان سٹارٹ اپ فنڈ ملک کی معاشی ترقی میں اہم کردار ادا کرے گا، وزارت آئی ٹی سٹارٹ اپس کو سہولیات فراہم کرنے کے لیے کوشاں ہے، پچھلے چار برس میں پاکستانی سٹارٹ اپس میں تقریبا 800 ملین ڈالرز بیرونی سرمایہ کاری ہوئی، ملک میں8نیشنل انکیوبیشن سینٹرز سٹارٹ اپس کو سپورٹ کر رہے ہیں، اس وقت 4 ہزار سے زائد سٹارٹ اپس کام کر رہے ہیں جو کہ ایک متحرک انٹرپرینیویل لینڈ سکیپ کی نشانی ہے۔