پاک سعودی عرب دفاعی تعاون کے حوالے سے تیسرا اجلاس ،دوطرفہ دلچسپی کے امور پر تبادلہ خیال کیا گیا

راولپنڈی ۔9جنوری (اے پی پی):پاکستان اور سعودی عرب کے درمیان دفاعی تعاون سے متعلق تیسرا اجلاس منگل کو جی ایچ کیو راولپنڈی میں منعقد ہوا جس میں باہمی، تاریخی اور برادرانہ قریبی تعلقات کی اہمیت پرزور دیا گیا۔ آئی ایس پی آر کے مطابق اجلاس کے دوران فورم نے دونوں برادر ممالک کے درمیان تاریخی تعلقات کی اہمیت کو اجاگر کیا اور شرکاء نے دوطرفہ دلچسپی کے امور اور ابھرتے ہوئے سکیورٹی ماحول پر تبادلہ خیال کیا۔

فورم نے فوجی ٹیکنالوجی میں تیز رفتار ترقی کیلئے دفاعی صنعت میں تعاون کی ضرورت پر غور کیا، جبکہ مشترکہ مقاصد کی تکمیل کیلئے دفاعی صنعتی تعاون بڑھانے پر بھی تبادلہ خیال ہوا۔اجلاس میں دفاعی پیداوار کے شعبے میں خود کفالت کیلئے تمام شعبوں میں دفاعی تعاون بڑھانے کی خواہش کا بھی اعادہ کیا گیا جبکہ فورم نے دفاعی تعاون اور تعاون کی رفتار کو بڑھانے کے لئے مزید راستے تلاش کرنے کی ضرورت پر بھی زور دیا۔