مکہ مکرمہ۔9جنوری (اے پی پی):سعودی عرب کے وزیرِ برائے حج و عمرہ ڈاکٹر توفیق الربیعہ نے کہا ہے کہ گزشتہ سال سہولتوں میں اضافے کے باعث عمرہ زائرین کی تعداد تقریباً 50 لاکھ (58 فیصد)کے ریکارڈ اضافے کے ساتھ ایک کروڑ 35 لاکھ 50 ہزار تک پہنچ گئی ہے جو اب تک سب سے زیادہ ہے ۔اردو نیوز کے مطابق پیر کو حج و عمرہ کانفرنس کے افتتاحی اجلاس سے خطاب کرتے ہوئے انہوں نے کہا کہ 2019 میں بیرون مملکت سے 85 لاکھ 50 ہزارعمرہ زائرین آئے تھے، مکہ روٹ پراجیکٹ سے اب تک آٹھ ممالک کے 6 لاکھ 17 ہزار عازمین مستفید ہوچکے ہیں۔انہوں نے کہا کہ عمرہ زائرین کی آمد کو آسان بنانے کے لیے 200 سے زیادہ نئے اقدامات کئے ہیں ، تمام خلیجی ممالک میں مقیم غیرملکیوں کو سعودی عرب آنے اور عمرہ کرنے کے لیے ای ویزے کی سہولت دی گئی ہے، ٹرانسپورٹ کے شعبے میں پارٹنرز کے ساتھ مل کر براہ راست پروازوں میں اضافہ کیا گیا، پہلے 164 ایئرپورٹس سے پروازیں آتی تھیں اب ان کی تعداد 32 فیصد اضافے کے ساتھ 216 کر دی گئی۔ان کا کہنا تھا کہ سعودی عرب اپنے یہاں تاریخی مقامات کو جدید خطوط پر استوار کر رہا ہے، اب تک دس نئے تاریخی مقامات پر کام مکمل کرلیا گیا ہے ، 18 ایسے مقامات تیار کیے گئے ہیں جن سے زائرین کی معلومات میں اضافہ ہوگا، بارہ تاریخی مقامات کو جدید خطوط پر استوار کرنے کا کام جاری ہے۔ سعودی وزیر حج نے بتایا کہ حج 2024 کے دوران 35 سے زیادہ کمپنیاں زائرین کو خدمات فراہم کریں گی۔ انہوں نے کہا کہ اس سال مدینہ منورہ میں بھی عمرہ کانفرنس اور نمائش کا اہتمام کیا گیا ہےجس میں 80 سے زیادہ ملکوں کے وزرا اور عہدیدار شریک ہیں، تمام شریک ممالک کے ساتھ حج انتظامات کے حوالے سے معاہدے ہوگئے ہیں۔ ان کا کہنا تھا مشاعر مقدسہ (منیٰ، مزدلفہ اور عرفات) میں نیا انفرا سٹرکچر قائم کرنے کے لیے پانچ ارب ریال سے زیادہ کے منصوبے متعارف کرائے ہیں، گزشتہ سال حج و عمرہ خدمات فراہم کرنے والے 40 ہزار سے زیادہ اہلکاروں کو ٹریننگ دی گئی جبکہ اس سال ایک لاکھ بیس ہزار سے زیادہ اہلکاروں کو ٹریننگ دی جا رہی ہے۔انہوں نے کہا کہ عازمین میں آگہی کا معیار بلند کرنے کے لیے کوشاں ہیں، محکمہ اوقاف کے تعاون سے آگہی مرکز قائم کیا جا رہا ہے۔ڈاکٹر توفیق الربیعہ نے کہا کہ وزارت ان ممالک سے آنے والے عازمین کی خدمت بھی کر رہی ہے جن کے یہاں حج مشن نہیں ہیں، وزارت نے حج پورٹل کے ذریعے گزشتہ سال 67 ممالک کو سہولت دی تھی اس سال دائرہ وسیع کر دیا گیا ہے اور 126 ملکوں کو کم لاگت پر معیاری خدمات براہ راست فراہم ہوں گی۔ وزیر حج نے بتایا کہ انہوں نے 13 ملکوں کا دورہ کیا جس سے عازمین حج و عمرہ کے مسائل کو سمجھنے میں آسانی ہوئی۔علاوہ ازیں کانفرنس کے موقع پر زائرین کو زیادہ سے زیادہ سہولتیں فراہم کرنے کے لیے وزارت حج و عمرہ، محکمہ اوقاف اور ضیوف الرحمٰن پروگرام کے درمیان معاہدہ ہوا ہے۔ محکمہ اوقاف اور ام القریٰ کمپنی کے درمیان 2.5 ارب ریال کی لاگت سے زائرین کو خدمات فراہم کرنے کے لئے کاروباری مراکز اور ہوٹل قائم کرنے کے معاہدے پر دستخط کئےگئےہیں۔