کاشتکاروں کو لہسن کی فصل کو مختلف بیماریوں سے بچانے کےلئے 3سے 4مرتبہ گوڈی کی ہدایت

فیصل آباد۔ 03 جنوری (اے پی پی):کاشتکار وں کو لہسن کی فصل کو مختلف بیماریوں سے بچانے کے لئے فوری طور پر3 سے4 مرتبہ گوڈی اور جڑی بوٹیوں کی فوری تلفی کی ہدایت کی ہے۔ ریسرچ انفارمیشن یونٹ آری فیصل آباد کے ماہرین زراعت نے کہاکہ کاشتکار لہسن کی فصل کو مختلف بیماریوں اور کیڑے مکوڑوں کے حملہ سے بچانے کےلئے حفاظتی اقدامات کریں خاص کر جھلساؤ کی بیماری کے بارے میں کسی غفلت کامظاہرہ نہ کریں ۔

پتوں کے جھلساؤ کی بیماری کے لہسن کی فصل پر حملہ آور ہونے سے پتے اوپر سے سوکھنے لگتے ہیں جبکہ جوں جوں حملہ شدت اختیار کرتاہے تمام پتے خشک ہو کر چڑ مڑ ہوجاتے ہیں اور اس طرح لہسن کی گٹھیوں کا سائز چھوٹا رہ جاتاہے اور فصل کو شدید نقصان ہوتا ہے۔

انہوں نے بتایاکہ اس بیماری کی علامت اگرچہ کورے کے نقصان سے ملتی جلتی ہے لیکن اس بیماری کے جراثیم زیادہ نقصان دہ ہوتے ہیں۔ انہوں نے کہاکہ کاشتکار فصل کو 3سے4 مرتبہ گوڈی ضرور کریں اور جڑی بوٹیوں کو بروقت تلف کرنے میں کسی کوتاہی کا مظاہرہ نہ کریں۔