نگران وفاقی وزیر اطلاعات مرتضیٰ سولنگی کا سابق وزیر خزانہ سرتاج عزیز کے انتقال پر اظہار افسوس

اسلام آباد۔2جنوری (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی نے سابق وزیر خزانہ سرتاج عزیز کے انتقال پر گہرے دکھ اور افسوس کا اظہار کیا ہے۔ منگل کو اپنے تعزیتی بیان میں وفاقی وزیر اطلاعات نے سرتاج عزیز کے اہل خانہ سے دلی تعزیت اور ہمدردی کا اظہار کیا۔

انہوں نے کہا کہ سابق وزیر خزانہ سرتاج عزیز کے انتقال کی خبر سن کر دلی افسوس ہوا، سرتاج عزیز ایک سیاسی قد آور شخصیت اور معیشت دان تھے، وہ ایک ایسے رہنما تھے جنہوں نے پاکستان کی ترقی میں اہم کردار ادا کیا۔ انہوں نے کہا کہ ملکی معاشی مسائل کے حل کے لئے سرتاج عزیز کی خدمات ناقابل فراموش ہیں۔ مرتضیٰ سولنگی نے دعا کی کہ اللہ تعالیٰ مرحوم کو اپنے جوار رحمت میں اعلیٰ مقام اور لواحقین کو صبر جمیل عطا فرمائے۔ آمین