اسلام آباد۔2جنوری (اے پی پی):نگران وفاقی وزیر برائے منصوبہ بندی، ترقی و خصوصی اقدامات محمد سمیع سعید سے منگل کو چین کے چانگ چیانگ چیمبر آف کامرس کے چیئرمین لی ٹنگ کی قیادت میں ایک اعلیٰ سطحی تجارتی وفد نے ملاقات کی۔ ملاقات کا مقصد پاکستان اور چین کے درمیان مختلف شعبوں میں ممکنہ تعاون کے مواقع، کاروبار میں توسیع اور سرمایہ کاری کے نئے مواقع تلاش کرنا تھا۔8 ارکان پر مشتمل وفد نے مختلف صنعتوں درآمد و برآمد، ٹیکنالوجی، الیکٹرانکس، مشینری، دفتری سامان، ملبوسات اور تعمیراتی مواد کے شعبہ کی نمائندگی کی ۔ بات چیت میں دوطرفہ تعلقات کو مضبوط بنانے اور باہمی فائدہ مند شراکت داری کے لئے سٹرٹیجک شعبوں کی نشاندہی پر تبادلہ خیال کیا گیا۔وفاقی وزیر محمد سمیع سعید نے سرمایہ کاری کے لئے اہم شعبوں پر زور دیا جن میں زراعت، آئی ٹی اور ٹیلی کام، مائنز اینڈ منرلز اور توانائی کے شعبے شامل ہیں۔ انہوں نے خصوصی اقتصادی زونز سے استفادہ کے مواقع پر روشنی ڈالتے ہوئے کہا کہ پاکستان غیر ملکی سرمایہ کاری خصوصاً چینی سرمایہ کاروں کو مشترکہ منصوبوں اور پاکستان میں صنعتوں کی منتقلی کے لئے حوصلہ افزائی کرتا ہے۔ وفاقی وزیر نے پاکستان کے جغرافیائی محل وقوع پر بھی روشنی ڈالی کیونکہ نوجوان ملک کی 60 فیصد سے زائد آبادی پر مشتمل ہیں جو خاص طور پر آئی ٹی کے شعبے میں کاروبار کے وسیع مواقع فراہم کرتے ہیں۔وفاقی وزیر نے سرمایہ کاروں کے لئے محفوظ کاروباری ماحول فراہم کرنے کے لئے حکومت پاکستان کے عزم کا اعادہ کیا تاکہ سرمایہ کاروں کی سہولت کو اولین ترجیح دی جائے۔انہوں نے کہا کہ غیر ملکی سرمایہ کاروں کے لئے ون ونڈو آپریشن اور صنعتی زونز میں سکیورٹی کو یقینی بناناحکومت کی اولین ترجیح ہے، حکومت بی 2 ٹی سرمایہ کاری کی حوصلہ افزائی کرتی ہے اور زراعت، خوراک، آئی ٹی ، مصنوعی ذہانت اور صنعتی تعاون جیسے شعبوں میں مواقع تلاش کرنے کے لئے کاروباروں کو خوش آمدید کہتی ہے۔ وفاقی وزیر نے بیلٹ اینڈ روڈ انیشیٹو (بی آر آئی) کو آگے بڑھانے کے لئے حکومت کے عزم کی توثیق کی خاص طور پر فلیگ شپ پروگرام، چین پاکستان اقتصادی راہداری منصوبے پر تیزی سے ترقی ہو رہی ہے ۔انہوں نے کہا کہ پاکستان غیر ملکی سرمایہ کاری کی سہولت اور حوصلہ افزائی کے لئے پرعزم ہے، چین اور دیگر ممالک کے ساتھ باہمی طور پر فائدہ مند تعلقات کو یقینی بناتا ہے، اس کاوش کا مقصد خوشحالی اور ترقی کو فروغ دینا، ہماری دونوں قوموں کو فائدہ پہنچانا اور علاقائی اور عالمی معیشتوں میں مثبت کردار ادا کرنا ہے۔وفد نے وزیر منصوبہ بندی کو خصوصی سووینئر پیش کئے جبکہ وفاقی وزیر کی جانب سے وفد کو بھی سووینیئر پیش کیا گیا۔