علامہ اقبال اوپن یونیورسٹی کا جلسہ تقسیم اسناد 31جنوری کو ہوگا

اسلام آباد۔2جنوری (اے پی پی):علامہ اقبال اوپن یونیورسٹی کا جلسہ تقسیم اسناد 31جنوری 2024ء کو اسلام آباد کے جناح کنونشن سینٹرمیں منعقدہوگا۔ گذشتہ روز وائس چانسلر پروفیسر ڈاکٹر ناصر محمود کی زیر صدارت تیاریوں کا جائزہ اجلاس منعقد ہوا۔یونیورسٹی کے ڈینز، پروفیسر اور پرنسپل افسران شریک تھے۔ وائس چانسلر پروفیسر ڈاکٹر ناصر محمود نے آزاد کشمیر ریجنز کے طلبہ کی خواہش پر انہیں اسلام آباد کے کانووکیشن میں شامل کرنے کا فیصلہ کردیا ہے۔

یاد رہے قبل ازیں یونیورسٹی نے مقامی سطح پر طلبہ کو سہولت فراہم کرنے کے لئے آزاد کشمیر کے طلبہ کے لئے مظفر آباد میں 30جون، 2024ء کو کانووکیشن منعقد کرانے کا شیڈول جاری کیا تھا۔اس فیصلے کی روشنی میں اب اسلام آباد، گلگت بلتستان، آزاد کشمیر اور راولپنڈی ڈویژن(اٹک، چکلالہ، جہلم اور راولپنڈی)کے طلبہ اسلام آباد کے جناح کنوینشن سینٹر میں 31جنوری کے جلسہ تقسیم اسناد میں شرکت کریں گے۔

وائس چانسلر پروفیسر ڈاکٹر ناصر محمودنے واضح کیا ہے کہ آزاد کشمیرکے طلبہ کو اسلام آباد کے کانووکیشن میں شامل کرنے سے اُن کی حوصلہ افزائی ہوگی کیونکہ ان کی خواہش تھی کہ انہیں بھی صد رپاکستان کے ہاتھوں سے ڈگری ملنے کا اعزاز حاصل ہو۔