لاہور۔2جنوری (اے پی پی):چیف ایگزیکٹو لیسکو انجینئر شاہد حیدر کی زیر نگرانی انسداد بجلی چوری مہم جاری ہے۔ 24 گھنٹوں کے دوران ریجن بھر میں 259 ملزمان بجلی چوری میں ملوث پائے گئے،تمام بجلی چوروں کے خلاف ایف آرز کی درخواستیں متعلقہ تھانوں میں دائرکی گئیں،جس میں سے128 درخواستیں رجسٹرڈ ہوئیں جبکہ 10 افراد کو گرفتار کیا جا چکا ہے۔پکڑے جانے والے کنکشنز میں 6 کمرشل،1 زرعی اور252 ڈومیسٹک تھے۔تمام کنکشنز منقطع کرکے ان کو 3 لاکھ 13 ہزار304یونٹس ڈیٹکشن بل کی مد میں چارج کئے گئے ہیں جن کی مالیت اٹھترلاکھ باون ہزارچار سو اکاون روپے ہے۔بجلی چوروں ے خلاف کئےجانے والے آپریشن میں بڑے کمرشل صارفین بھی بجلی چوری میں ملوث پائے گئے۔ان تمام کے کنکشنز بھی منقطع کئے گئے اور ان کو ڈٹیکشن یونٹس چارج کئے گئے۔چوہنگ کے علاقے میں کنکشن کو709,876 روپے،گوالمنڈی کے علاقے میں کنکشن کو 200,000 روپے اورجوہر ٹاون کے علاقے میں کنکشن کو150,000 کی رقم چارج کی گئی ہے۔انسداد بجلی چوری مہم کو115 روز مکمل ہوگئے ہیں،اس دوران کل39937 ملزمان بجلی چوری میں ملوث پائے گئے جن میں سے39523 ملزمان کے خلاف مقدمہ درج کرنے کی درخواستیں جمع کروائی گئیں،37838 ملزمان کے خلاف مقدمات درج کروا کر16626 ملزمان کو گرفتار کیا گیا۔ بجلی چوروں کو اب تک چھ کروڑ چھپن لاکھ نو ہزارآٹھ سواٹھارہ یونٹس چارج کئے گئے ہیں،جن کی مالیت دو ارب چونتیس کروڑ تہتر لاکھ ستر ہزار چار سوسینتیس روپے ہے۔واضح رہے بجلی چوروں کےخلاف آپریشنز وفاقی پاور ڈویژن کی جانب سے دی گئی ہدایات کے مطابق کئے جا رہے ہیں اور لیسکو چیف انجینئر شاہد حیدر بذاتِ خود ان آپریشنز کی نگرانی کر رہے ہیں۔ لیسکو چیف کا کہنا ہے کہ بجلی چوری کے مکمل خاتمے تک بلا تفریق گرینڈ آپریشن جاری رہے گا،آپریشن کے دوران بجلی چوروں کے ساتھ ساتھ ان کی سرپرستی کرنے والے لیسکو افسران و ملازمین کو بھی قانون کے کٹہرے میں لایا جائے گا۔