اسلام آباد۔2جنوری (اے پی پی):2023 پاکستان میں پانی اور پن بجلی کے شعبوں کیلئے بہتر ین سال ثابت ہوا، 2023 میں پن بجلی کی زیادہ پیداوار حاصل ہوئی،پانی اور پن بجلی کے شعبوں میں جاری واپڈا منصوبوں پر بھی اہم اہداف حاصل کئے گئے، آئندہ پانچ سال میں پن بجلی پیدا وار20 ہزار میگا واٹ ہوجائے گی۔واپڈا کی طرف سے جاری اعلامیہ کے مطابق 2023 میں واپڈا نے 34 ارب یونٹ سستی اور ماحول دوست پن بجلی پیدا کی جو گذشتہ سال کی نسبت 2 ارب 20 کروڑ یونٹ زیادہ ہے۔ پن بجلی کی اضافی پیداوار سے ملکی خزانہ کو 106 ارب روپے کی بچت ہوئی۔ا گر بجلی کی یہی مقدار مہنگے درآمدی ایندھن سے پیدا کی جاتی توقومی خزانہ کو 106 ارب روپے خرچ کرنا پڑتے۔واپڈا پن بجلی کی لاگت 3 روپے51 پیسے فی یونٹ ہے اور نیشنل گرڈ میں واپڈا پن بجلی کا تناسب 30 فیصد ہے۔ نیلم جہلم ہائیڈروپاور پراجیکٹ سمیت واپڈا کے 22پن بجلی گھر ہیں، جن کی مجموعی پیداواری صلاحیت 9 ہزار 459 میگا واٹ ہے۔ 2023 زیر تعمیر منصوبوں کیلئے بھی بہتر سال ثابت ہوا۔ مالی مشکلات کے باوجود واپڈا کے تمام 8 زیر تعمیر منصوبوں پر تعمیراتی سرگرمیاں پوری رفتار کے ساتھ جاری رہیں۔ واپڈا نے فروری2023 میں داسو ہائیڈروپاور پراجیکٹ پر دریا کا رخ موڑنے کا اہم سنگ میل عبور کیا، جبکہ دیامر بھاشا ڈیم پراجیکٹ پر بھی ٹیسٹ رن کے ذریعے دریاکا رخ موڑا جا چکا ہے۔توقع ہے کہ مہمند ڈیم پراجیکٹ سائٹ پر بھی آئندہ تین سے چار ماہ میں دریا کا رخ موڑدیا جائے گا۔ پاکستان کی واٹر، فوڈ اور انرجی سکیورٹی کیلئے واپڈا پانی اور پن بجلی کے شعبوں میں 8 بڑے منصوبے تعمیر کررہا ہے۔ یہ منصوبے2024 سے 2028-29 تک مرحلہ وار مکمل ہوں گے۔ ان منصوبوں کی تکمیل سے ملک میں پانی ذخیرہ کرنے کی صلاحیت میں 9.7 ملین ایکڑ ٖ فٹ اضافہ ہوگا، جبکہ آئندہ پانچ سال میں پن بجلی پیدا کرنے کی صلاحیت بھی تقریباً 10 ہزار میگا واٹ اضافہ کے ساتھ دوگنا ہوکر20 ہزار میگا واٹ ہوجائے گی۔