لاہور۔1جنوری (اے پی پی):پاکستان ریلوے نے تاریخ میں پہلی بار 6ماہ میں چالیس ارب آمدن کا ہندسہ عبور کر لیا۔ مالی سال 2023-24 کی پہلی ششماہی میں 41 ارب روپے کی آمدن۔ پچھلے سال جولائی تا دسمبر یہ آمدن 28 ارب روپے تھی۔ پاکستان ریلوے پر امید ہے کہ مالی سال کا ٹارگٹ ایک ماہ قبل حاصل کر لیا جائے گا۔چیف ایگزیکٹو افسر پاکستان ریلوے عامر بلوچ نے کہا ہے کہ وسائل کے درست اور موثر استعمال سے ریکارڈ آمدن کا حصول ممکن ہوا۔ ریونیو میں اضافہ ریلوے ملازمین کی انتھک محنت اور لگن کا نتیجہ ہے۔اس ضمن میں کوئی اضافی خرچہ نہیں کیا گیا اور نہ ہی حکومت سے کوئی پیسے لیے گئے۔انہوں نے کہا کہ درست اقدامات سے ہم نے ریلوے کا پہیہ چلا دیا ہے، آنے والے دن اچھے ہوں گے۔ تنخواہوں کی ادائیگی میں تاخیر بھی کم ہو چکی ہے اور ہم سفری سہولیات میں بھی اضافہ کر رہے ہیں۔ سی ای او ریلوے نے کہا کہ ایم ایل ون کا آغاز ہو گیا تو مزید اچھی خبریں آئیں گی،محدود ترین وسائل میں 41 ارب کی آمدن ہمارے ٹیم ورک اور ڈیڈی کیشن کا نتیجہ ہے۔ ہم اسی لگن سے محکمے کی سربلندی کیلیے کام جاری رکھیں گے۔پاکستان ریلوے نے6ماہ میں مسافر ٹرینوں سے 24 ارب جبکہ فریٹ ٹرینوں سے ساڑھے گیارہ ارب کا ریونیو حاصل کیا۔ دیگر سیکٹرز سے آمدن تقریبا ساڑھے5ارب روپے رہی۔